Javier Pastore ka qenë një futbollist që ka vuajtur shumë nga lëndimet. Argjentinasi u largua nga Elche pak ditë më parë, pasi e kuptoi që nuk mund të jepte më shumë. Në moshën 33-vjeçare, ai po kërkon një ekip të ri, por mund të kishte vazhduar te PSG, megjithëse pranoi se nuk ishte në nivelin e ekipit parisien.
Në një intervistë për “OhMyGoal”, argjentinasi foli hapur, duke befasuar me deklaratat e tij.
“Ishte shumë e vështirë, sepse nuk doja të largohesha. Zemra ime më tha: “Do të qëndrojmë për pesë vjet dhe do ta përfundoj karrierën time këtu”. Ishte ëndrra për çdo futbollist, të luante 12 ose 15 vjet atje.”
Në atë kohë, Pastore ishte në një ekip ëndrrash të përbërë nga Neymar dhe Mbappé, me lojtarë të tjerë po aq të rëndësishëm si Di María ose Cavani. Messi, që mbërriti më vonë, ishte futbollisti me të cilin Pastore ëndërronte të luante:
“Të luaja me Messin dhe Mbappenë dhe të mund t’ua tregoja fëmijëve të mi më pas…. Kjo do të ishte dhurata më e madhe, por nuk e bëra. Nuk kisha nivelin për Paris Saint-Germain.”
Gjithsesi, Pastore është mirënjohës ndaj PSG-së për trajtimin që i bëri:
“Për mua, ishte koha e duhur, nuk doja të isha kokëfortë, por ishte edhe e ndërlikuar, sepse presidenti Al-Khelaïfi nuk donte të më linte të largohesha. Ai më tha: “Do ta shihni, gjithçka do të ndryshojë, le të shkojmë të vizitojmë një mjek për dëmtimet tuaja. PSG më dha shumë në të gjitha nivelet, personalisht, nga ana sportive dhe ekonomikisht”.
Pastore u largua nga Parisi në vitin 2018 dhe kaloi tri sezone në Romë, ku nuk mundi të luante rregullisht. Vitet e tij më të mira i kaloi te PSG, por kur u shfaqën dëmtimet, ai futbollist magjik argjentinas, që mahniti te Palermo, nuk u pa më kurrë.
