Davide Calabria përdori Instagram-in për t`iu përgjigjur thashethemeve të shumta që qarkullojnë prej disa ditësh në rrjetet sociale mbi disa zënka në dhomat e zhveshjes të skuadrës kampione në fuqi në Itali.
“Fitorja ose humbja, si kritika, është pjesë e kësaj bote.
Ne e pranojmë atë dhe jemi të parët që nuk jemi të lumtur dhe që dëshirojmë të ndryshojmë gjërat.
Ajo që absolutisht nuk pranojmë janë gënjeshtrat e panumërta që kanë ndjekur njëra-tjetrën për disa ditë dhe duke përfshirë shokët e mi dhe veten time”, shkroi kapiteni i Milan-it në Instagram Stories.
“Grupi ynë është një grup fantastik, i shëndetshëm dhe i përbërë mbi të gjithë nga njerëz që e duan njëri-tjetrin, me vlera të mëdha morale, respekt dhe vlerësim të ndërsjelltë.
Le të vazhdojmë të qëndrojmë të fokusuar në punën tonë me kokën në fushë dhe mjaft me këto përfundime absurde”, ishte mesazhi i plotë i kapitenit.
