Futbollisti legjendar i Liverpoolit, tashmë analist, Jamie Carragher, ende vazhdon t’u kujtojë tifozëve të Manchester United debaklin që ndodhi të dielën.
Liverpooli e mposhti Manchester Unitedin me rezultat 7-0 dhe i shkaktoi rivalit më të madh humbjen më të rëndë në historinë e këtij derbi.
Carragher filloi menjëherë të tallet me rivalin e tij, ku gjatë komentit të ndeshjes publikoi një selfie së bashku me legjendën e United, Gary Neville.
Neville e Carragher
Shprehja e fytyrës së Neville tregonte se sa e vështirë ishte për të në ato momente, ndërkohë që klubi i tij i dashur po përjetonte një debakël.
Ish-mbrojtësi i Liverpool shkoi një hap më tej mbrëmë në provokimin e rivalëve të tij më të mëdhenj.
Carragher solli një pije “7up” në emisionin në studio, e cila i kushtohej ndeshjes së Ligës së Kampionëve mes Chelsea dhe Borussia Dortmund, e vendosi para tij dhe vuri në dukje mbishkrimin gjatë gjithë emisionit.
Sigurisht, arsyeja është për të kujtuar se sa gola shënoi Liverpooli i tij ndaj rivalit më të urryer në derbin që u luajt të dielën.
