Trajneri i Mançester Sitit, Pep Guardiola, është duke menduar seriozisht transferimin e yllit të Bajernit të Mynihut, Joshua Kimish, në “Etihad” për sezonin e ardhshëm në rast se Ilkai Gyndoan do të largohet nga kampionët.
Mesfushori gjerman konsiderohet një prej më të mirëve në botë në rolin e tij që kur debutoi pikërisht me Guardiolën në stolin e Bajernit në vitin 2015.
Por ashtu si shumë shokë të tjerë të skuadrës, Kimish nuk është i kënaqur me mënyrën se si është menaxhuar klubi i tij këtë sezon, ndërsa rrezikon që ta mbyllë atë pa fituar asnjë trofe.
Dhe sipas “The Sun”, me mundësinë e largimit të Gyndoanit në fund të sezonit, duke qenë në skadencë kontrate, Kimish është një alternativë për ta zëvendësuar ish-talentin e Dortmundit te “qytetarët”.
Guardiola do të shfrytëzojë edhe Zhoao Kanselon në këtë operacion. Mbrojtësi i huazuar te Bajerni nuk do të transferohet përfundimisht nga kampionët e Gjermanisë në fund të sezonit, pasi ata mendojnë se 60 milionë paundët që kërkon Siti janë shumë për portugezin.
Por anglezët pritet ta përdorin kartonin e tij si mundësi për të ulur çmimin e Kimishit, i cili ka edhe dy vite kontratë në Mynih.
