Jean Francois Domergue, shef i “Elite Youth Development Program U15” në UEFA, ka qëndruar për një vizitë katërditore në Kosovë, ku ka ndjekur nga afër punën e këtij programi që tashmë zhvillohet prej tre vitesh në vendin tonë.
Domergue, i cili e ka nën mbikqyrje këtë program në 55 vendet anëtare të UEFA-së, pas vëzhgimit të aktiviteteve në Kampin Nacional në Hajvali, ku gjatë katër ditëve u zhvilluan ndeshjet ndërmjet regjioneve të kësaj grupmoshe dhe njoftimit me sistemin e përzgjedhjes së lojtarëve e trajnimit të të këtij programi, ka dhënë edhe këshillat e nevojshme se si duhet vepruar tutje për t’u avancuar edhe më shumë ky projekt.
Ai ka përgëzuar Federatën e Futbollit të Kosovës për punën e deritanishme në këtë program dhe angazhimin e të gjithë pjesëmarrësve, teksa ka mbetur i mahnitur me mënyrën se si ekipet janë paraqitur me uniforma unike, por edhe me përkushtimin e talenteve në fushën e gjelbër.
Domergue ka kërkuar që në të ardhmen dinamika e programit të rritet edhe më shumë dhe të jetë në përputhje me risitë e futbollit në të gjitha aspektet.
Gjatë kësaj vizite me praninë e tij mysafirin nga UEFA, por edhe pjesëmarrësit e këtij programi i ka nderuar edhe përzgjedhësi i Kombëtares së Kosovës, Alain Giresse, me të cilin Domergue ka qenë bashkëlojtar.
Ata së bashku para futbollistëve folën për rëndësinë që ka ky program në zhvillimin e tyre dhe në krijimin e një karriere të suksesshme. Domergue e Giresse ndanë eksperiencat e tyre në fushën e futbollit dhe i inkurajuan të gjithë pjesëmarrësit të punojnë shumë për të arritur sukses në karrierën e tyre.
Domergue vuri në pah se krahas punës në këtë program, futbollistët e kësaj grupmoshe duhet të bëjnë punë sa më profesionale edhe në klubet e tyre, në mënyrë që të sigurohet zhvillimi i duhur i tyre dhe avancimi në nivele më të larta të futbollit.
Zyrtari i UEFA-së theksoi se programi “Elite Youth Development Program U15” është një hap i rëndësishëm drejt zhvillimit të futbollit të të rinjve në Kosovë, teksa u shpreh se për t’i përmbushur objektivat e tij, është e nevojshme që federata, klubet dhe trajnerët të punojnë ngushtë së bashku.
Ai gjithashtu tha se Kosova është në rrugën e duhur për të ndërtuar një sistem të qëndrueshëm të zhvillimit të të rinjve dhe se me angazhimin dhe punën e vazhdueshme ka potencial për të prodhuar talente të mëdha.
Në anën tjetër, përgjegjësi i këtij programi në FFK, Edmond Rugova, e ka falënderuar mysafirin nga UEFA për vizitën dhe për sugjerimet e këshillat e dhëna, me qëllim që ky projekt të jetë edhe më i suksesshëm në të ardhmen. Rugova ka theksuar se Kosova ka talente të jashtëzakonshme, por që është e nevojshme që t’u kushtohet kujdesi i mjaftueshëm dhe puna profesionale.
