Presidenti i Barcelonës, Joan Laporta është në pritje konstante të sponsorëve të rinj për t’i sistemuar bilancet e gjigantit katalunas dhe që të operojë më me qetësi në “treg”, për t’i evituar penalizimet e “fair-play” financiar.
Sipas informatave që i sjell “Catalunya Radio”, klubi “Blaugrana” e ka marrë një ofertë të pabesueshme për t’ia shitur emrin e saj një skuadre të Qatar Stars League, e cila luan në ligën elitare të Katarit.
Oferta është e parefuzueshme, e parezistueshme: 100 milionë euro në vit për ta krijuar një klub që do të quhej Barcelona.
Një ofertë tërheqëse, por që duhet t’i kalojë disa pengesa që do t’i dalin përpara: fillimisht statuti i klubit, i cili me gjasë do të duhet të modifikohet.
Barcelona ishte goditur rëndë nga pandemia dhe ishte detyruar t’i shiste disa asete të klubit, por dalëngadalë ka nisur ta marrë veten.
