Manchester United ka piketuar Rasmus Hojlund si përforcimin e duhur për majën e ofensivës, ndërkohë që edhe 20-vjeçari danez dëshiron me çdo kusht transferimin në “Old Trafford”.
Por, Atalanta nuk e lëshon lehtë dhe kërkon 70 mln euro për ta lënë të lirë. Klubi italian e bleu verën e vitit të kaluar për 18 mln euro nga austriakët e Sturm Graz.
Hojlund pati një impakt pozitiv në Serie A. Dhe sezonin e parë me ekipin bergamask e mbylli me 10 gola. Ndërkohë, drejtuesit e klubit italian kanë gjetur në La Liga pasardhësin e sulmuesit nordik.
Dhe bëhet fjalë për El Bilal Toure, sulmuesin e Almerias dhe kombëtares së Malit. 21-vjeçari bëri shumë mirë në sezonin e parë në Spanjë, duke shënuar 7 gola në kampionat, teksa regjistroi edhe 2 asiste.
Drejtuesit e Atalantës kanë arritur marrëveshjen me homologët e Almerias për blerjen e menjëhershme të lojtarit afrikan për shumë 27 milionë euro + 3 të tjera në formë bonusesh.
Tani pritet vetëm zyrtarizimi. Me El Bilal Toure që do të shndërrohet në blerjen më të shtrenjtë në historinë e klubit zikaltër.
