Sergio Rico është larguar nga spitali Virgen del Rocio në Sevilje sot në orën 12:30. Portieri i PSG-së ishte shtruar atje për gati tre muaj pas një aksidenti me kalër. Ishte spitali i Seviljes që njoftoi largimin e tij.
“Nuk do ta besoj derisa të kalojmë pragun”, kështu tha dje partnerja Alba Silva atë që po konfirmojnë sot gazetat franceze, e para nga të gjitha ishte Le Parisien.
Në fund të korrikut, neurologu David Perez njoftoi se lojtari do t’i nënshtrohej një operacioni për të trajtuar një aneurizëm dhe ky operacion mund të lejojë Sergio Rico të rifillojë normalisht karrierën e tij.
Pikërisht në këtë pikë, shumë pyesin nëse Rico do të mund të rikthehet vërtet në fushë: situata e tij e përgjithshme është përmirësuar, por ai do të duhet të vazhdojë rehabilitimin derisa të rifitojë përqindjen e konsiderueshme të masës muskulore që humbi gjatë shtrimit në spital.
Sergio Rico u desh të përballej me një dëmtim të rëndë në kokë dhe për këtë arsye ai qëndroi në koma për 22 ditë para se të zgjohej. Në fillim të korrikut ai kishte dashur të falënderonte të gjithë në profilin e tij në Instagram për dashurinë në momentet e vështira dhe afërsinë me familjen:
“Doja të falënderoja secilin nga njerëzit që më treguan dashurinë e tyre në këto ditë të vështira.
Unë vazhdoj të punoj për rehabilitimin tim, i cili po përmirësohet çdo ditë. Ndihem shumë me fat edhe një herë, faleminderit të gjithëve dhe shpresoj të shihemi së shpejti”.
Portieri spanjoll mund të konsiderohet me fat duke qenë se nëse plaga do të kishte qenë më e thellë se gjysmë centimetri ai do të kishte vdekur menjëherë.
Ajo që nuk dihet dhe nuk do të vërtetohet kurrë është nëse Sergio Rico ka qenë në kalë kur ka ndodhur aksidenti apo jo: pasi nuk ka pasur dëshmitarë, gjyqtari i gjykatës numër 2 në Palma del Condado vendosi pushimin e çështjes.
