Federata e Futbollit të Maqedonisë pak më parë ka marrë konfirmimin nga UEFA se stadiumi “Burimet e Biljanës” në Ohër do të jetë nikoqir i ndeshjes së play-off-it ndërmjet Struga Trim Lum dhe Breidablik nga Islanda për kualifikim në fazën e grupeve të Ligës së Konferencës.
"Për shkak të këtij vendimi, komisioni i garave të FFM-së është i detyruar të shtyjë ndeshjen nga raundi i dytë i Ligës së Dytë ndërmjet Ohrit Lihnidos dhe Karaormanit për më 30 gusht.
Vendimi është marrë për të krijuar të gjitha kushtet e nevojshme në stadium për organizimin e një ndeshje të kompeticionit të UEFA-s dhe këtu prioritet është mbrojtja e fushës së stadiumit në Ohër.
Shpresojmë që ndryshimi i vonuar, por i detyruar do të kuptohet në mënyrën e duhur nga dyja skuadrat e Ligës së Dytë, të cilat duhej ta luanin nesër ndeshjen e tyre", njofton FFM.
