Rasti i dopingut me Paul Pogba nuk ka tronditur vetëm Juventusin, por edhe Francën. Mesfushori i Juventusit nuk ishte në skuadrën e Didier Deschamps në grumbullimin e këtij muaji, por trajneri i Les Bleus nuk e ka shmangur komentin për incidentin.
“Natyrisht që jam shumë i befasuar, si i gjithë grupi, por nuk kam elementë për të gjykuar këtë çështje.
Shumë gjëra negative po grumbullohen për të, është një moment shumë i vështirë. Do të kem kohë të flas me të në Ditët në vijim i shkrova një mesazh”, tha Deschamps pas disfatës ndaj Gjermanisë.
“A ka marrë produkte me vetëdije? Nuk mund ta imagjinoj, duke e njohur e di që nuk do ta bënte.
Më kujtohen diskutimet me të për vaksinën dhe Covid-in. Por kjo substancë është në trupin e tij, nuk e dimë se si ‘ka kaluar’.
Unë do ta mbështes, por ai ka forcën dhe karakterin për të kapërcyer këto kohë shumë të vështira”, deklaroi Deschamps.
