Ernest Muçi përjetoi një të enjte të paharrueshme. Sulmuesi i talentuar i kombëtares shqiptare, shënoi dy gola në suksesin 3-2 të Legias së Varshavës kundër Aston Villas në Conference League.
22-vjeçari mposhti dy herë kampionin e botës Emiliano Martinez, duke u dhuruar tifozëve polakë një mbrëmje magjike. Muçi u shpall lojtari më i mirë i ndeshjes, teksa në momentin e zëvendësimit shijoi një “standing ovation”.
Falë formës së mirë dhe ndeshjes fantastike kundër skuadrës së fortë angleze, Muçi është përzgjedhur si një nga katër kandidatët për t’u shpallur më i miri i javës së parë në Conference League.
Lojtari shqiptar garon me mbrojtësin Luca Ranieri, i cili shënoi dy golat e Fiorentinës në barazimin 2-2 në Belgjikë kundër Genkut.
Me Jakub Piotrowskin, mesfushorin polak të Ludogorets, i cili shënoi (2x) dhe dhuroi asist në triumfin 4-0 të ekipit bullgar me Spartak Trnava.
Kandidati tjetër është Zvonimir Kozulj, i cili u fut në fushë në pjesën e dytë për Zrinjskin. Skuadra boshnjake po humbiste 0-3 përballë AZ Alkmaar.
Ndërkohë që 29-vjeçari regjistroi dy gola dhe një asist, duke ndihmuar kampionët e Bosnjës që kompletonin përmbysjen e çmendur 4-3.
