Egnatia ka nisur përgatitjet për supersfidën që do të ketë me Partizanin në kuadër të javës së 13-të të “Abisnet Superiore”, e cila do të luhet të shtunën në orën 14:00 në stadiumin e Rrogozhinës.
Në drejtimin e dyshes Tetova-Brahja, dje u stërvit i gjithë grupi i lojtarëve, ndërkohë përgatitje individuale zhvilluan Renato Malota dhe Fernando. Qendërmbrojtësi i rrogozhinasve ka marrë një goditje në kofshë në duelin me Erzenin dhe për të mos rrezikuar përballjen me Partizanin u stërvitet i veçuar.
Ndërkohë, braziliani Fernando vijon të ndiejë dhimbje në këmbën e djathtë dhe mjekët e klubit e panë të arsyeshme që mesfushori të stërvitej individualisht.
Si Malota, ashtu edhe Fernando priten të jenë gati për duelin e kreut që bardhe jeshilët do të kenë me Partizanin.
Mungesa e madhe për Egnatian sa i takon sfidës së fundjavës me “demat e kuq” është Abdurrahman Fangaj, i cili u ndëshkua me karton të kuq kundër Erzenit. Alternativa e shkodranit te kryesuesit e kampionatit është Bledar Lila.
Peqinasi e nisi titullar kundër Skënderbeut dhe ishte një nga lojtarët më të spikatur në sezonin e shkuar për Egnatian. Rikthim i rëndësishëm është ai i mesfushorit Albano Aleksi, i cili ka shlyer pezullimin për kartonë.
