Kombëtarja e Brazilit është si gjithmonë një nga pretendentet për të fituar Botërorët e moshave, duke pasur parasysh talentin e jashtëzakonshëm që ka gjithmonë në përbërje.
Kështu është edhe në Botërorin U17 që po zhvillohet këto ditë në Indonezi dhe ku “seleçao” do të tentojë të mbrojë titullin që fitoi në edicionin e kaluar.
Statusin e pretendentit dhe diferencën që ka me shumë vende të tjera, e ka treguar me fitoren e sotme me shifrat 9-0 ndaj Kaledonisë së Re. Një fitore e pritshme ndaj një rivali nga Oqeania, me një dominim që mori përmasa të frikshme.
Në këtë ndeshje Brazili tentoi 81 herë portën, me një gjuajte çdo 75 sekonda lojë.
Një hakmarrje për humbjen e papritur 3-2 ndaj Iranit në ndeshjen e parë në grup. Brazilianët e vegjël arritën të çonin 23 herë topin drejt katërkëndorit, me 33 tentativa që përfunduan jashtë dhe 25 që u bllokuan nga mbrojtësit.
E megjithatë, një numër kaq i madh gjuajtjesh nuk mjaftoi për t’iu afruar rekordit të Spanjës, e cila ka vendosur fitoren më të thellë në një kompeticion të tillë, me suksesin 13-0 ndaj Zelandës së Re në vitin 1997.
