Familja Zhang kërkon prej kohësh investitorë të rinj apo edhe blerës për Interin dhe me sa duket, interesimi ka filluar të bëhet shumë konkret nga grupe apo persona të interesuara për të marrë në pronësi zikaltrit.
Mediat italiane kanë zbuluar një blerës të mundshëm, i cili ka potencialin për të kthyer ekipin në një superfuqi në Europë.
“Il Giornale” ka publikuar lajmin se fondi financiar “Qatar Islamic Bank”, ka hedhur sytë nga zikaltrit dhe është gati të bëhet pjesë e paketës së investitorëve të rinj që kërkojnë pronarët kinezë, nëse vendosin që të mos e shesin plotësisht klubin.
Ky fond kishte dalë në skenë në muajt e kaluar pasi u bë publik lajmi se ishin të interesuar të blinin Mançester Junajtid. Por oferta e sheikut Jasim Bin Hamad Al Thani prej 6 miliard eurosh, u refuzua nga familja Glejzër që ka në pronësi “djajtë e kuq”.
Duket se sheikët kanë kthyer sytë nga një tjetër klub me emër si Interi dhe nuk është çudi që të shfrytëzojnë nevojën për likuiditetet të familjes Zhang, e cila në majin e viti të ardhshëm duhet të shlyejë borxhin prej 350 milionë eurosh që i detyrohet fondit “Oaktree”.
