Vllaznia ka arritur një fitore me shumë vlera ndaj Tiranës, duke u ngjitur, madje me pikë të barabarta, me Tiranën e vendit të tretë.
Mirëpo, kjo fitore nuk duket se ka shkuar siç duhet, pasi ka lënë me pasoja ekipin për takimin e fundit të këtij viti, atë ndaj Skënderbeut.
Dy krahët e mbrojtjes janë ndëshkuar me kartonë dhe do të mungojnë në këtë përballje.
Një lajm aspak i mirë, pasi në momentin kur gjërat filluan të shkonin siç duhet dyshja Smajli e Hakaj do të jenë jashtë planeve kuqeblu.
Mbrojtësi i djathtë, Gerald Smajli, u ndëshkua me kartonin e katërt të verdhë dhe si rrjedhojë humbet takimin, ndërsa mbrojtësi i majtë, Esin Hakaj, për shkak të kartonit të kuq të marrë pas vërshëllimës së fundit. Këta dy lojtarë do të prishin planet e teknikut Qatip Osmani për të gjetur dy emrat që do të zëvendësojnë Smajlin e Hakajn.
