Maguette Gueye është pranë largimit nga Partizani. Mesfushori i talentuar ka rënë në radarin e gjigantëve rumun të Steaua Bucurestit, raportojnë mediet rumune.
Një herë fituesit e Champions League kanë 3 objektiva në merkato për të përforcuar organikën dhe një prej tyre është një mesfushor qendror.
20-vjeçari afrikan është emri i përzgjedhur nga presidenti miliarder Gigi Becali i cili është i gatshëm të ulet në tavolinë me krerët e Partizanit për të hapur negociatat. Steaua Bucurest ose siç quhet tani, FCSB, po zhvillon një merkato të bujshme dhe me shpenzime marramendëse.
Maguette po shkëlqen këtë sezon me fanellën e kuqe duke qenë një titullar absolut.
Në 16 ndeshje, afrikani ka shënuar 3 gola e 1 asist, por cilësitë e tij më të mira janë shkatërrimet e aksioneve dhe ‘box-to-box’. Me një kontratë që i skadon verën e ardhshme, FCSB duhet të hapë thesin për lojtarin me Partizanin që është treguar mjaft i ‘sertë’ në tryezën e bisedimeve.
