Këshilla e parë: mos e nënvlerësoni Luton! Pep Guardiola e di mirë se çdo ndeshje e Premier League fsheh një rrezik.
Sidomos pas një ndeshjeje në të cilën u harxhua aq shumë energji si çerekfinalja e parë e Champions League kundër Real Madridit. Pasditen e sotme, Manchester City do të dalë në fushë kundër Luton për të ndjekur titullin e kampionit të Anglisë, por nuk dëshiron rënie të tensionit.
Duke folur në konferencë për shtyp, trajneri katalanas donte ta rriste përqendrimin përpara ndeshjes: “Njerëzit thonë se ne jemi shumë më lart, prandaj do të fitojmë. Jo, në futboll nuk ka fitore në letër, por duhen arritur në fushë.
Lojtarët janë gati, ne e dimë se për çfarë po luajmë, e dimë pse ky sezon ka qenë kaq i vështirë, për shumë arsye.
Lojtarët janë gati, nuk kam asnjë dyshim për këtë, pastaj rezultatin ia lëmë fushës”.
Një sy është edhe nga çerekfinalja e kthimit e Champions League, me energjitë që duhet racionalizuar më së miri në këtë pikë të sezonit: “Stërvitje, masazhe, ujë, ushqim të mirë, pushim të mirë. Kështu duhet t’i rezervojmë energjitë tona për secilën ndeshje të radhës. Përndryshe, lojtarët mund të lëndohen”.
