Ish- deputeti i Lidhjes Demokratike të Kosovës, Muhamet Mustafa, thotë se LDK-ja është penalizuar nga koalicioni me PDK-në, mirëpo ajo nuk është dobësuar.
Mustafa në një intervistë për “Bota sot” është shprehur se Lidhja Demokratike e Kosovës ka nevojë ta përmirësojë komunikimin me votuesit dhe t’i ripërtërijë aderuesit e saj.
Duke folur rreth koalicioneve të mundshme, Mustafa, ka pohuar se në rast të marrjes së Kryeministrisë ndoshta do të formonin koalicion me Vetëvendosjen, kurse një koalicion me PDK-në e ka përjashtuar nga të gjitha mundësitë.
Mustafa gjithashtu ka treguar marrëveshjet e koaliconit VLAN në 2014 si dhe arsyet që LDK-ja ishte larguar për t’i bashkangjitur Partisë Demokratike të Kosovës.
“Bota sot”: Keni dhënë dorëheqje nga aktivitetet politike pak para se të dalin rezultatet përfundimtare të zgjedhjeve, pse ky vendim?
Muhamet Mustafa: Unë e kam sqaruar këtë menjëherë për opinionin. Pashë disa votime në lagjen time dhe pasi në lagjen time përgjysmohen votat atëherë ishte e habitshme. Për dikë që nuk ka qenë aktiv në kuvend apo që nuk ka punuar në çështjet për të cilat unë kam punuar për dy mandate në kuvend, ndoshta nuk do të ishte habi, mirëpo për mua po, atëherë fillova të mendoj që sigurisht unë nuk mund t’i akuzoj votuesit e mi në qoftë se nuk më votojnë, por atëherë duhet të jenë diku gabimet e mia. Atëherë vendosa që të tërhiqem nga aktiviteti politik në institucione, por kjo nuk domethënë që unë jam tërhekur nga politika. Sepse unë do të vazhdoj të punoj për çështje tjera, e sidomos për politikat ekonomike në Riinvest, domethënë është një situatë kur unë dëshiroj të angazhohem dhe të forcoj komponentë në analiza për çështje kyçe ekonomike që kanë të bëjnë me zhvillimin ekonomik të Kosovës, për arsye se për shkak të politikave të donatorëve ky segment është zbehur tek Rinvesit dhe unë dëshiroj ta rikthej në nivel më të lartë. Projekti i dytë për të cilin dua të punoj është një forum qytetar i prishtinasve, sepse Prishtina është kryeqytet i Kosovës dhe i takon të gjithë qytetarëve të Kosovës. Por, Prishtina është edhe një komunë ku qytetarët e Prishtinës, banorët e komunës së Prishtinës kanë nevoja të ndryshme të cilat kanë edhe në komunat tjera dhe po hasin në vështirësi t’i realizojmë për shkak se ligji për Prishtinën nuk është sjellë dhe në shumë aspekte qytetarët të Prishtinës ndihen të margjinalizuar dhe ky forum do të bënë që të dëgjohet zëri i tyre më i fuqishëm për çështjen e zhvillimit të qytetit në të gjitha fushat. Dhe, projekti i tretë që unë dëshiroj të angazhohem më shumë është Qendra Shqiptare për Studime strategjike me seli në Tiranë, në të cilën unë e udhëheq bordin e asaj qendre, por nuk kam pasur mundësi të jem aktiv përderisa kam qenë deputet. Duke i pasur këto tri projekte të rëndësishme në mendje dhe duke e parë që në qoftë se partia ime nuk shqetësohet shumë për faktin që a do të jem unë në kuvend apo jo, si dhe nëse votuesit e mi nuk janë përgjigjur aq pozitivisht punën time në kuvend, domethënë në këto votimet e para sepse unë jam tërhequr para se të dalin rezultatet përfundimtare.
“Bota sot”: Përse ka rënë numri i votuesve?
Muhamet Mustafa: Të them të drejtën ende nuk kam një shpjegim, duhet të hulumtoj pse. Natyrisht që është një konfiguracion i ri i votave, ka qenë një votë revolte, një votë për ndryshim. Ndoshta nuk e kanë kuptuar përse e mbroj politikën ekonomike të Kryeministrit, të qeverisë. Mendoj se kanë qenë një kthesë shumë e rëndësishme politikat ekonomike për të cilat unë kam luftuar 15 vite si drejtor i Rinvestit dhe vetëm tani kanë hyrë në fuqi disa masa që janë miqësore për investitorët dhe biznese, gjë që shihet menjëherë me efekte pozitive. E dyta, unë e kam mbrojtur po ashtu politikën e qeverisë, Kryeministri ka pasur përkrahje time rreth demarkacionit. Mendoj se kjo çështje është shtyer pa nevojë dhe nuk besoj se do të ketë dyshime edhe në shqyrtimet e ardhshme, rishqyrtime apo edhe në arbitrazh. Se nuk do të ketë dyshime rreth demarkacioni e dokumenton edhe vendimi për kontekstin midis Kroacisë dhe Sllovenisë, në atë kontekst vendimi arbitrazh është se duhet të merret katastri dhe nëse merret katastri edhe demarkimit i kufirit midis Kosovës dhe Malit të Zi do të mbetet këtu ku është. Gjithmonë e kam thënë këtë, edhe Kryeministri e ka thënë këtë, fatkeqësisht ne kemi humbur dy vite dhe ka rrezik të humbet edhe një vit pa viza dhe me tensione politike të cilat kanë penguar zhvillimin politik dhe zhvillimin e demokracisë.
“Bota sot”: Në rast se qeveria e ardhshme do të formohet pa Lidhjen Demokratike të Kosovës, a do ta ratifikojnë demarkacionin?
Muhamet Mustafa: Nuk mund të supozoj me çka ata do të detyrohen ta bëjnë një gjë të tillë, nuk ka opsionet tjera pos katastrit dhe nëse merret katastri vija e demarkacionit do të merret këtu ku është.
“Bota sot”: Koalicioni juaj ka dalë në vend të tretë në zgjedhjet e 11 qershorit, përse kjo rënie e votuesëve të LDK-së?
Muhamet Mustafa: Të them të drejtën unë nuk kam qenë i angazhuar në aktivitetet partiake, nuk jam antarë i asnjë forumi partiak apo strukture partiake. Natyrisht që dy mandatet e fundit, në gjysmën e mandatit të kaluar dhe këtë mandat kam qenë në grupin parlamentar të LDK-së dhe e kam udhëhequr Komisionin për zhvillimin ekonomik në kuvend. Unë kam pritur se LDK-ja do të dalë më mirë, sidomos pas koalicionit me AKR-në që ishte një koalicion i natyrshëm. Por, e kemi nënçmuar disponimin e votuesve për ndryshime. Neve na kanë akuzuar pa të drejtë për koalicionin me PDK-në.
“Bota sot”: A e ka penalizuar LDK-në koalicioni me PDK-në?
Muhamet Mustafa: Po, mendoj se e ka penalizuar koalicioni me PDK-në. Rënia ka qenë edhe pasojë që LDK-ja ka mungesë publiciteti, nuk ka komunikim të mirë me qytetarët dhe votuesit dhe përderisa LDK-ja nuk shndërrohet në një parti moderne me metoda moderne të komunikimit me votuesit e vet dhe qytetarët e vet, atëherë edhe rangimi i saj do të jetë më poshtë se sa që e meriton ajo për nga programi dhe për nga ajo që e meriton për njerëzit që ka në listë. Lista e LDK-së këtë vit ka qenë një listë me të vërtetë shumë e mirë, shumë e fortë dhe ajo listë është dashur që të fitojë.
“Bota sot”: Në cilën pjesë duhet të ndryshojë LDK-ja?
Muhamet Mustafa: LDK-ja si parti duhet të forcojë organizimin në degë, duhet të jetë shumë më prezentë në nëndegë, duhet të jetë komunikuese me votuesin, duhet të ketë një vizuelitet më modern, duhet të vazhdojë të ripërtërihet me aderues, me njerëz që e duan LDK-në, që e kanë përherë në zemër LDK-në, e këso janë shumë. Kjo që bëri kryetari i LDK-së, profesori Isa Mustafa tash me futjen e njerëzve të rinj që ka edhe shumë të tjerë që duhet të inkuadrohen dhe deri në zgjedhje LDK-ja duhet të konsultohet dhe të ndryshojë. E përsëris edhe një herë duhet të ndryshojë në aspektin e publicitetit dhe marketingut politik si dhe përmirësimin e komunikimit. Jam i bindur që do të del edhe më mirë.
“Bota sot”: Pas certifikimit të rezultateve përfundimtare, ku e shihni LDK-në, në koalicion me Vetëvendosjen, koalicionin PAN apo në opozitë?
Muhamet Mustafa: Nuk e di tani. Në koalicion me PAN kurrësesi. Unë e kam bërë një postim dhe e kam cekur që në qoftë se të gjitha partitë janë bërë bashkë që ta shkarkojnë qeverinë e LDK-së, nuk ishte halli për qeverinë e PDK-së, sepse ata nuk do ta shkarkonin qeverinë e vet. Por, “tullusum” iu kishte bërë qeveria e LDK-së për shkak se ishte një trend i sukseseve, pastaj u bënë bashkë të gjithë që ta largonin LDK-në, prandaj nuk ka shumë moral politik që të kërkojnë koalicion me LDK-në. Të njëjtit që janë bërë bashkë që ta rrëzojnë LDK-në prej një qeverie të suksesshme dhe stabile, tani kërkojnë që LDK-ja të futet si patericë e tyre. Unë do të isha kundër kësaj, këta që janë formuar kundër asaj, le të bëhen bashkë ta formojnë qeverinë. Unë mendoj që LDK-ja më mirë të qëndrojë në opozitë dhe të bëjë konsolidimin që e thashë më lartë, të bëjë konsolidimin me fytyra të reja politike, me rinin, ka plot rini që janë entuziastë që dëshirojnë ta rigjenerojnë LDK-në dhe LDK-ja të kthehet më e fortë. Natyrisht që, nëse do të vinte situata që LDK-ja ta ketë kryeministrin e ta vazhdojë programin e reformave ekonomike atëherë do të mendoja, ndoshta do të isha më fleksibil për këtë qëndrim. Por, LDK-ja të hyjë me një Kryeministër tjetër ajo vetëm do të humbiste. Nëse subjektet politike dëshirojnë të vazhdojë programi ekonomik i qeverisë, programi i reformave ekonomike dhe integrimeve evropiane ku ka pasur sukses, atëherë LDK-ja duhet të mendojë të vazhdojë me qeverisje të vendit, me vazhdimin e programit ekonomik aty ku ka mbetur, përndryshe jo t’iu bashkangjitet.
“Bota sot”: Është përfolur që PDK-ja ka tentuar vazhdimisht ta dobësojë LDK-në dhe kjo është arritur me rrëzimin e qeverisë, cili është komenti juaj?
Muhamet Mustafa: Nuk mendoj se kanë arritur ta dobësojnë LDK-në. Ata që kanë tentuar ta bëjnë LDK-në e dobët, në fakt e kanë bërë veten shumë më të dobët, edhe unë iu kam tërhequr edhe vërejtjen atë ditë kur ka ndodhur mocioni, sepse ata po e fusnin vendin në një jo stabilitet dhe sigurisht që dëshira e madhe që ta heqin LDK-në nga pushteti i shtyri që të bëjnë gabimin, të bëjnë koalicione të jo natyrshme, koalicione për të cilat ata janë dënuar nga votuesit. Ajo që ka humbur më shumë deputetë në krahasim me tjerë është PDK-ja, natyrisht që Vetëvendosja ka një rritje dhe kjo rritje sepse nuk kanë qenë në pushtet deri më tani dhe e shohin si faktor ndryshimi, se sa do të jetë ajo faktor ndryshimi mbetet për t’u parë. Ne e njohim vetëm një retorikë të Vetëvendosjes, njohim një luftë ndonjëherë shumë të vrazhdë politike deri në dhunë ndaj institucionit të shtetit, ndaj kuvendit, ndaj policëve, që është një dhunë e pa pranueshme. Por, përtej retorikës nuk e njohim mënyrën e qeverisjes së Vetëvendosjes, unë do të dëshiroja që Vetëvendosja të bëjë korrigjimet e duhura dhe të shndërrohet në faktor të ndryshimit që i nevojitet kësaj shoqërie.
“Bota sot”: Në legjislaturën e kaluar nuk jeni pajtuar me shumë veprimet e Lëvizjes Vetëvendosje, në rast se Vetëvendosja pranon t’ia jep kryeministrin LDK-së, a do të pranonte LDK-ja dhe sa mund të jetë i përshtatshëm koalicioni?
Muhamet Mustafa: Nuk jam njeriu që vendosi, mirëpo në atë rast do të mendoja seriozisht që të bëhet koalicioni me Vetëvendosjen. E përsëris me Vetëvendosjen ndoshta po, por me PDK-në jo.
“Bota sot”: Në rast se dalin nga koalicioni me PDK-në, AAK-ja dhe Nisma, a do të bëheshit bashkë për formimin e qeverisë?
Muhamet Mustafa: Për atë vendosin partia, por ata tashmë janë në koalicioni dhe nuk e di sa do të ndahen. Me faktin që nuk kemi mundur të merremi vesh me AAK-në gjatë kohës së VLAN-it, tregon që se nuk do të merremi vesh, sepse AAK-ja kërkon kryeministrin dhe LDK-ja nuk mund ta jep kryeministrin. Po të ishte me fleksibile AAK-ja atëherë PDK-ja do të ishte në opozitë që në vitin 2014, por AAK-ja ka qenë shumë kokëfortë deri në atë që LDK-ja të mbetet pa asnjë funksion. Pas vendimit të Gjykatës Kushtetuese unë e di që AAK-së iu kanë ofruar edhe funksione, edhe zëvendës-kryeministri me mundësi që kur të bëhen zgjedhjet për President AAK-ja ta merr Presidentin, por ajo nuk ka pranuar ka insistuar ta merr vetëm Kryeministrin. Edhe pse, në marrëveshjen që e kemi pasur me AAK-në shkruan që nëse LDK-ja nuk e merr Kuvendin apo ndonjë funksion tjetër e gjitha marrëveshja rikonstruktohet, ata nuk kanë qenë të gatshëm ta konsiderojnë marrëveshjen. Prandaj, fakti pse nuk është bërë koalicioni i VLAN-it, nuk është fajtore LDK-ja por është fajtore AAK-ja. Këtu është ai problemi që nuk iu kemi sqaruar shikuesve. Në fund është dashur të bëhet koalicioni me PDK-në patjetër, edhe pse unë kam qenë lojtar i madh që ta dërgoj PDK-në në opozitë, jo pse është PDK-ja, por për fakti që është 8 vite në pushtet dhe nuk ka asgjë kjo qeveri është koha që ajo të qëndrojë në opozitë. Kjo ka qenë e gjitha dhe faktikisht këtë çështje ne nuk e kemi sqaruar mirë në opinion. Strukturat e LDK-së kanë faj që nuk e kanë sqaruar mirë, por nuk ka pasur rrugëdalje pa e formuar koalicionin me PDK-në, sepse partnerët ndërkombëtarë humbën durimin duke na pritur 6 muaj dhe thanë që vendi nuk gjen zgjidhje duhet të formohet koalicioni. I thanë LDK-së që ti je parti e rëndësishme, disa parti të vogla mund të luajnë dhe ta lëjnë vendin në atë gjendje, por LDK-së nuk i shkon. LDK-ja e mori Kryeministrin, për atë kohë nuk ishte pak sepse edhe PDK-ja bërë skarificë e dha kryeministrin, u bë puna mirë dhe filluam mirë. Por, lufta e opozitës në atë kohë ishte primitive dhe e vrazhdë, bëri probleme të mëdha.
“Bota sot”: A do të kërkoni dorëheqjen e Presidentit tani pasi është rrëzuar qeveria?
Muhamet Mustafa: E them që jam larguar nga aktivitetet politike dhe nuk më takon të flas, mirëpo në rast se ai shkel kushtetutën duhet të japë dorëheqjen. Nuk kam ndonjë argument se ai e ka shkelur kushtetutën, megjithatë për habi kanë qenë disa infiltrimet e tij në iftare me mësuesit, biseda me minoritetet për t’i bindur që ta votojnë mocionin, por për këtë nuk kam argument por flitet.
“Bota sot”: A mund t’i nënshtrohet Kosova një krize politike në rast se nuk formohen institucionet e reja?
Muhamet Mustafa: Këtë do ta shohim në dy javë të ardhshme. Natyrisht që mund të hyjë, unë nuk do të dëshiroja që ta përsërisim VLAN-in, për arsye se ka shumë probleme kjo qeveri, duhet të vazhdojë punën. Të shohim, vështirësitë janë, por besoj që presidenti do të ndërmerr masa të shpejta do ta provojë koalicionin fitues dhe në rast se brenda 10 apo 15 ditëve do të emërohet tjetër dhe nëse i kanë numrat atëherë për një muaj apo dy muaj do të zvarritet.
“Bota sot”: Sa është e dëmshme për ekonominë e Kosovës një krizë eventuale?
Muhamet Mustafa: Shumë e dëmshme. Një mik i imi avokat që punon në vitin e fundit ka pasur shumë kontakte me investitorë pas reformave ekonomike, edhe tani ka 6 muaj që askush nuk e kontakton, prej turit të zgjedhjeve edhe këto me zgjedhje atë askush nuk e kontakon që të vijë të investoj. Kjo është vetëm një nga sinjalet, por besoj që shumë shpejt do të konsolidohet dhe do të vazhdojë reforma ekonomike.
“Bota sot”: A kanë ndikuar zgjedhjet e parakohshme në ekonominë e vendit?
Muhamet Mustafa: Nuk i kemi të dhënat, në qoftë se nuk krijohet krizë serioze institucionale dhe vauukum institucional do të tejkalohet kjo, por nuk do të mbetet pa ndikim.
“Bota sot”: Buxheti i Kosovës është rritur gjatë qeverisjes së LDK-së, si e shihni të ardhmen e buxhetit në rast se nuk do të hyjë LDK-ja në qeverisje?
Muhamet Mustafa: Mbetet për t’u parë se kush do të vjen ne qeveri. Nëse vijnë ata që kanë udhëhequr ad hok me ekonominë, e kanë transformuar në një instrument elektoral që të marrin votat atëherë mund të presim ditë jo të mira për buxhetin, nëse vazhdohet kjo mënyrë serioze me analiza, jo të vendoset ad hok, duke i respektuar prioritetet e zhvillimit të vendit atëherë mund të vazhdohet ky trend që ka filluar nga ajo qeveri.
“Bota sot”: Keni deklaruar se përmes pakos fiskale keni përmirësuar gjendjen e bizneseve në Kosovë, nga cilat vendet ndërkombëtare janë rritur invesimet?
Muhamet Mustafa: Më shumë nga Evropa, nga Gjermania, nga Italia, sigurisht edhe nga Turqia, këto kanë qenë vende që kanë investuar më shumë.
“Bota sot”: Z. Mustafa jeni shprehur vazhdimisht që keni bërë uljen e papunësisë, mirëpo numri i njerëzve të pa punë e sidomos të sapo diplomuarëve vazhdon të jetë i lartë, cila do të ishte zgjidhja për zbutjen apo edhe zhdukjen e papunësisë?
Muhamet Mustafa: Keni plotësisht të drejtë! Statistikat tregojnë që papunësia ka rënë prej 32 për qind në 27 për qind gjatë këtyre dy tri viteve të fundit, kjo është rezultat shumë mirë. Por, në anën tjetër statistikat e punësimit në Kosovë nuk janë kurrfarë, ne nuk kemi statistika kush është në punë dhe përderisa nuk i kemi statistikat sa njerëz janë në punë kemi vështirësi që të shohim në përgjithësi dimensionet qoftë të punësisë, qoftë të papunësisë. Atëherë mbetet që të analizohen këto fenomene më thellë, kurse problemi i punësimit është faktikisht është në këto masat e politikës ekonomike: pakoja fiskale (1), pakoja fiskale (2), ligji për investime strategjike (3), ligji për Trepçën (4), ligji për garantimi për kredi (5), ligjet për standardizimet e ndryshme (6), ligjet për prona (7) shumë ligje që i kemi sjellë,këto janë ligje që kanë kaluar nëpër komisione dhe këto krijojnë një mundësi të mirë për rritje të punësimit, rritje të eksportit, rritje të ofertës vendore dhe prodhimeve vendore dhe me anë të këtyre masave të projekteve fiskale për të funksionuar duhet të funksionojë shteti ligjor, domethënë gjykatat dhe prokuroria.
“Bota sot”: Të rinjtë e Kosovës vazhdojnë ta kenë alternativë perëndimin për një punësim apo edhe për një të ardhme më të mirë, përse ndodh kjo dhe si mund të parandalohet?
Muhamet Mustafa: Vetëm me hapje të prospektivës, hapjen e vendeve të punës. Në qoftë se është një qeverisje e mirë, i kthehet besimi dhe rriten pritjet e rinisë se në Kosovë ka perspektivë. Kjo është zvogëluar kohëve të fundit, në krahasim me atë ikje të madhe në fillim të mandatit të kësaj qeverie , tani janë qetësuar, por janë latente që ta braktisin Kosovën. Është shumë e dhimbshme, në një liri 17 vjeçare, të kërkojnë zgjidhje në perëndim, por qeverisja e keqe ka bërë të ndodh kjo.
“Bota sot”: Sa mandate do i nevojiteshin LDK-së ta ndryshojë këtë gjendje?
Muhamet Mustafa: Me një qeveri të mirë, qoftë LDK apo ndonjë qeveri tjetër, dy mandate do të duhen të përmirësohet gjendja e ekonomisë dhe të hapen perspektiva.
“Bota sot”: A do të duhej të kalonte dialogu me Serbinë në nivel presidentësh?
Muhamet Mustafa: Nuk e di që do ka dalë në nivel presidentësh, por nuk duhet të kalojë në këtë nivel sepse kuvendi i Kosovës duhet të jetë në mbikëqyrje të plotë të dialogut, temave, dilemave, problemeve të dialogut kërkojnë angazhim më shumë se sa kur kanë qenë më herë, nuk jam i sigurt nëse do të udhëhiqej në nivel presidentesh do të mund të mbikëqyret. Do t’i thosha Presidentit që mos ta marrë një barrë të tillë sepse mund ta dëmtojë veten dhe Kosovën.
“Bota sot”: A do t’i realizojë Serbia marrëveshjet e nënshkruara në Bruksel, përfshirë këtu që në një të ardhme ta njoh shtetin e Kosovës?
Muhamet Mustafa: Varet prej shumë rrethanave, Serbia patjetër duhet që një ditë ta njoh Kosovën, sepse nuk mundet ndryshe. Serbia është e çuditshme mendon se ende mund ta ketë Kosovën, ata ende jetojnë me fantazi të mesjetës, apo të ngatërresave historike që mbijetojnë nga dëshira për të jetuar, nga dëshira për të dominuar, nga dëshira të reja dhe të vjetra për të dominuar mbi fqinjët e tyre. Është e çuditshme se si nuk e kuptojnë, patjetër që deri sa nuk i normalizojnë marrëdhëniet me Kosovën ata do të jenë të robëruar në hijen e mendimit dhe në udhëheqjen e popullit serb si dhe janë duke mbajtur peng edhe rajonin. Por, këtu ka faj edhe bashkësia ndërkombëtare sepse ka qenë tolerante ndaj Serbisë. Mua më kujtohet kur ishin bisedimet e Vjenës unë e kam udhëhequr grupin e ekspertëve të ekonomisë në këto bisedimet dhe kur e bënim agjendën se çfarë do të diskutohej, unë e futa në agjendë të diskutohen dëmet e luftës, pronat e humbura, shkatërrimet, krejt dëmet që i ka bërë Serbia, ai diplomat më tha nuk bën, atëherë unë i thashë unë nuk mund të kthehem në Kosovë pa i diskutuar këto çështje për arsye se njerëzve i janë djegur shtëpitë dhe dëmet tjera. Populli i Kosovës dëmet publike ndoshta edhe mund t’i falë, por pronat privat askush nuk i falë. Ai filloi të zbutje dhe më tha t’i vendosin në mënyra të ndryshme dhe i vendosi të gjitha, në mënyrë diplomatike dhe ashtu është bërë. Por, ai më tha që Bashkësia ndërkombëtare domethënë akterët kyç të Bashkësisë ndërkombëtare janë pajtuar që Kosova të jetë e pavarur, por nuk janë dakord ta dënojnë Serbinë. Kosova po e pavarur, por jo Serbisë t’i bëhet një katarsis siç e ka pasur Gjermania e Hitleri dhe me qenë se Serbisë nuk i është bërë ky katarsis si dënim ndaj politikë së Millosheviçit, nga populli serb ende Millosheviçi konsiderohet si hero dhe njerëzit e Millosheviçit janë në pushtet, edhe Vuçiqi edhe Daçiqi që kanë qenë bashkë e Millosheviçin në pushtet dhe nuk e kanë kritikuar atë politikë, atëherë ne nuk mund të presim se ky proces do të shkojë shpejt. Kjo fatkeqësisht lë pasojat shumë të rënda për gjendjen në rajon dhe gjendjen në Serbi. Këtu është problem edhe i Bashkësisë ndërkombëtare, nuk është problem vetëm i Serbisë.
“Bota sot”: A do të bëhet asociacioni i komunave serbe, përkundër që ka shkelje të kushtetutës?
Muhamet Mustafa: Edhe këtu LDK-ja nuk ka qenë e zonja të tregojë si duhet. Në atë marrëveshje pika e parë është që dokumentet e asociacioni a janë të kryera me kushtetutë do t’i vlerësojë Gjykata Kushtetuese e Kosovës dhe kjo pika e parë e parimeve të marrëveshjes është nënshkruar edhe prej Vuçiqit edhe prej kombësisë evropiane, Fedrica Mogherini. Ky është rezultati më i madh i bisedimeve dhe është sulmuar më së shumti, sepse po e njeh Serbia se çfarë thotë Gjykata Kushtetuese e Kosovës, e ka nënshkruar që do ta pranojë edhe Serbia edhe kombi evropian. Prandaj, edhe ka qenë e mundur kjo të shkojë në Gjykatë Kushtetuese dhe t’i jep mendimet ku kjo marrëveshje nuk është në harmoni të plotë dhe t’i pranojë Serbia, sepse nëse nuk do ta nënshkronte Serbia do të thoshte çfarë më intereson mua çfarë thotë Gjykata Kushtetuese e Kosovës, por e ka nënshkruar. Tash mendoj që në bazë të mendimit që e ka dhënë Gjykata Kushtetuese, kjo nuk do të bëhet. Ai asociacion mund të dimenzionohet brenda sistemit kushtetues të Kosovës pa tiparet e pushtetit të tretë dhe pa funksione ekzekutive të pushtetit të tretë, në atë rast mund të gjendet një konsulicion për këtë asociacion i cili është pak a shumë obligim i bisedimeve të Vjenës dhe planit të Ahttisarit që na obligon neve sepse në bazë të atij plani është shpallur pavarësia e Kosovës.
