Gjykata Themelore e Pejës, dega në Deçan, ka caktuar masën e paraburgimit prej 1(një) muaj, për të dyshuarit Avni Shalaj (1987) nga Pavlani, Komuna e Pejës, dhe Gëzim Dakaj (1982) nga Stankaj, Komuna e Pejës, si të dyshuar për kryerjen e veprës penale “tentim vjedhje”, bazuar në kërkesën e Prokurorisë Themelore të Pejës.
Në seancën gjyqësore të udhëhequr nga gjyqtari Nexhat Musaj, është aprovuar kërkesa e Prokurorisë së Pejës, e përfaqësuar nga prokurorja, Sanije Seferi Gashi, që ndaj të dyshuarve Shalaj dhe Dakaj, të caktohet masa e paraburgimit nga një muaj, konform neneve 187 dhe 188 të KPPRK-së. Prokurorja e shtetit, ka arsyetuar kërkesën e saj, me faktin se të dyshuarit, pos veprës së kryer, janë përsëritës të veprave të ngjashme, sikurse që të njëjtit mund të ndikojnë te dëshmitarët në hetim të ratsit.
Mirëpo, me kërkesën e prokurores së shtetit, nuk ishin pajtuar avokatët mbrojtjes, Daut Cacaj (avokat mbrojtës i të pandehurit Avni Shalaj) dhe Merita Binakaj (avokate mbrojtëse i të pandehurit Gëzim Dakaj), të cilët kamë kërkuar që masa e paraburgimit të zëvendësohet me ndonjë masë tjetër alternative, me arsyetim se të dyshuarit vec se kanë pranuar veprën e kryer, e nuk paraqesin rrezik për pengim të hetimeve të mëtejme.
Gjyqtari Musaj, pasi kishte analizuar provat e prezantuara nga Prokuroria e Pejës, si dhe bazuar në nenet 185,186 dhe 187 dhe të KPPK-së, ka vendosur që të dyshuarve, Avni Shalaj dhe Gëzim Dakaj, tu shqiptohet masa e paraburgimit prej një muaj.
