Një qendër e re e inovacionit dhe ndërmarrësisë ka marrë jetë sot në Mitrovicë, ku do të ketë trajnime, laboratorë, investim, hulumtim e zhvillim për studentë, mësimdhënës, afaristë dhe gjithë të interesuarit të cilët kanë ide.
Kryetari i Kuvendit të Kosovës, Kadri Veseli, duke përmendur inovacionin si perspektivë për të rinjtë dhe të ardhmen e tyre me orientim evropian, ka folur edhe për debatin mes politikanëve që po zhvillohet kohët e fundit.
Sipas tij, askujt nuk i duhet një debat i tillë i brendshëm, i cili siç u shpreh ai, po krijon shqetësime tek qytetarët.
Veseli: Kosova është e të gjithë neve
“Është inovacioni, është tregtia, është ekonomia e tregut e bazuar në sektorin privat. Kjo është perspektiva, është përgjegjësi e secilit që jeni në sallë studentë e profesorë. Kosova nuk është e askujt as më shumë as më pak, është e të gjithë neve ”, ka thënë Veseli.
Ai ka potencuar se qëllimi e të gjithëve është orientimi perëndimor i cili nuk lejon në asnjë mënyrë dhe nga askush të ketë përçarje dhe ndarje me SHBA-të.
Bedri Hamza, ministër i Financave, potencoi se qendra e inovacionit dhe ndërmarrësisë është një ngjarje e rëndësishme sepse të gjitha studimet e fundit kanë dëshmuar nevojën për një ndërlidhje të qëndrueshme mes universiteteve, arsimit dhe biznesit.
Hamza:Ka nevojë për një ndërlidhje në mes universiteteve dhe biznesit
“Janë tre arsye kryesore që më bëjnë sot të lumtur. E para jam në qytetin tim në mesin e njerëzve që i takoj çdo ditë të cilët i respektoj dhe më respektojnë. E dyta jam në një objekt të dijes, shkencës, të rëndësisë së veçantë… dhe e treta jemi këtu sot për një ngjarje shumë të rëndësishme, përkatësisht qendrën e inovacionit dhe ndërmarrësisë…Të gjitha trendet, studimet, analizat e fundit dëshmojnë që ka nevojë për një ndërlidhje të qëndrueshme mes universiteteve, arsimit dhe biznesit”, theksoi Hamza.
Edhe Besim Beqaj, ministër i Inovacionit, ka bërë të ditur se qendra e inovacionit bën ndërlidhjen perfekte të njohurive, përvojës dhe sfidës për të ardhmen.
Beqaj: Qendra që bën ndërlidhjen e njohurive dhe sfidës për të ardhme
“Këtu jemi sot për ta promovuar qendrën e cila bën ndërlidhjen në mënyrë perfekte të njohurive, elanit, gatishmërisë, të përvojës dhe sfidës për të ardhmen dhe kjo është qendra për inovacion në Universitetin e Mitrovicës Isa Boletini”, sqaroi Beqaj.
Ndërkaq, rektori i universitetit ‘Isa Boletini’ në Mitrovicë, Alush Musaj, ka bërë të ditur se qendra inovative do të ndikojë në rritjen e punësimit për të gjithë.
“Sot jemi mbledhur për një ngjarje që do të ndikoj në rritjen e punësimit për studentë, mësimdhënës dhe njerëz të biznesit”, tha ai.
Në anën tjetër, vetë inovatori Shend Musliu, tha se faktori njeri dhe tërësia e burimeve njerëzore më së miri bëjnë krijimin e qendrave të tilla innovative.
“Unë kam kaluar provimin në lëndën qeveria dhe universiteti. Shpresoj të kaloj provimin edhe në lëndën industria”, tha Musliu.
