Policia e Tropojës u vjen në ndihmë 2 turistëve belg. Mësohet se dy turistët nga Belgjika, një djalë i moshës 25 vjeç dhe një vajzë 26 vjeçe, duke eksploruar natyrën në zonën e Lekbibaj, kishin humbur rrugën në një zonë të thellë.
Duke u munduar për të dalë nga terreni i vështirë, 25-vjeçari është dëmtuar në këmbë.
Turistët kanë njoftuar Policinë dhe kanë kërkuar ndihmë, pasi 25-vjeçari nuk ecte dot për shkak të dëmtimeve që kishte marrë në këmbë.
Menjëherë kanë nisur kërkimet nga shërbimet e Komisariatit të Policisë Tropojë dhe pas disa orë kërkimesh është bërë e mundur gjetja e dy turistëve, në vendin e quajtur "Stakaj".
Turistët janë transportuar me ambulancë në spitalin e Tropojës dhe ndodhen jashtë rrezikut për jetën.
Ata kanë falenderuar punonjësit e Policisë që i erdhën në ndihmë.
