Prokuroria Themelore në Ferizaj ka ngritur aktakuza ndaj dy personave nga Ferizaj, të cilët kishin falsifikuar çertifikatën dhe vërtetimin e veteranit luftëtar të Ushtrisë Çlirimtare të Kosovës. Me këto veprime, ata kanë dëmtuar buxhetin e shtetit mbi 2 mijë euro.
Sipas njoftimit të Prokurorisë, të pandehurit R.A. dhe N. A. dyshohet se gjatë muajit prill të vitit 2018 me anë të dokumenteve të falsifikuara kanë aplikuar në skemën e pensioneve dhe beneficioneve të familjeve të dëshmorëve, invalidëve të luftës dhe kategorive tjera të përcaktuara me ligj.
Me këto veprime, ata kanë dëmtuar buxhetin e shtetit mbi 2 mijë euro.
“…me dokumente të falsifikuara edhe atë çertifikatën veteran luftëtar dhe vërtetimin e veteranit luftëtar, të pandehurit kanë aplikuar në skemën e pensioneve dhe beneficioneve të familjeve të dëshmorëve, invalidëve të luftës dhe kategorive tjera të përcaktuara me ligj, ku kanë arritur të përfitojnë pagë mujore prej 170.00 eurove secili veç e veç, nga muaji maj 2018 deri në muajin shtator 2018, duke i shkaktuar dëme materiale të dëmtuarës -Ministrisë së Punës dhe Mirëqenies Sociale në shumë prej 1.020.00 euro secili veç e veç”, thuhet në njoftim.
Sipas Prokurorisë, me këto veprime, të pandehurit R.A., dhe N.A., kanë kryer veprën penale “Legalizimi i përmbajtjes së rreme” nga neni 403 paragrafi 1 të Kodit Penal të Republikës së Kosovës.
Prokurori i çështjes, me rastin e ngritjes së aktakuzës, i ka propozuar Gjykatës, që të pandehurit të shpallen fajtor dhe të dënohen sipas ligjit për veprën penale e cila iu vihet në barrë.