Prokuroria e Shtetit e ka intervistuar Yll Raçin nga Podujeva, i cili sot ka deklaruar se të rinjtë po e shesin votën nga 20 euro.
Këtë e ka bërë të ditur zëdhënësi i Prokurorisë Speciale të Kosovës, Ekrem Lutfiu.
“Pas publikimit të lajmit me titull “Plaku” i ri nga Llapi: Të rinjtë po e shesin votën për 20 euro”, Prokurori i Shtetit menjëherë ka marrë masa, si dhe e ka intervistuar personin në fjalë. Gjatë intervistimit i njëjti e ka mohuar se ka njohuri lidhur me shitjen e votës dhe se për këtë nuk di asgjë”, ka deklaruar Lutfiu.
Ndërkohë, Raçi sot ka thënë se rinia po mashtrohet, duke e shitur votën.
Ai ka thënë se të rinjtë po e shesin votën për 20 euro, derisa deklaroi se pleqtë e kanë votuar çdo herë një parti të njëjtë.
“Pleqtë i falënderoj gjithmonë, ata kur e votojnë një parti një herë, e votojnë çdo herë. E rinia është duke u mashtru, po e shesin votën për 20 euro. Mos e shtini votën”, ka thënë Raçi.
