Presidenti i Serbisë, Aleksandar Vuçiq, bisedoi sot me ministrin e Punëve të Jashtme dhe Evropiane të Sllovakisë, Ivan Korçok, dhe vlerësoi se bashkëpunimi midis dy vendeve po përparon vazhdimisht.
Siç thuhet në njoftimin e zyrës së Vuçiqit, ai shprehu mirënjohje për mbështetjen e Sllovakisë në çështjen e Kosovës dhe në integrimin evropian të Serbisë.
Vuçiç e njoftoi mysafirin me situatën në rajon dhe përshëndeti angazhimin e diplomatit sllovak Miroslav Lajçak si përfaqësues special i Bashkimit Evropian në dialogun midis Kosovës dhe Serbisë dhe çështje të tjera rajonale në Ballkanin Perëndimor.
Ai përsëriti se Serbia është e përkushtuar për ta ruajtur stabilitetin në Ballkanin Perëndimor dhe se do të vazhdojë ta ndjekë një politikë të paqes dhe bashkëpunimit në rajon.
