Gjykata Themelore në Gjilan ka njoftuar se e ka aprovuar kërkesën e Prokurorisë Themelore të Gjilanit, duke i caktuar masën e paraburgimit prej 30 ditë të pandehurit Princ Valentino Corleone.
Sipas kësaj mase ai duhet të mbahet në Institutin e Psikiatrisë Forenzike në Prishtinë, me qëllim të ekzaminimit dhe observimit.
Ndërsa në anën tjetër, nga Instituti i Psikiatrisë Forenzike thonë se nuk kanë vende të lira.
Instituti tha se nëse merret një vendim i tillë duhet të pritet disa ditë deri të lirohet ndonjë vend.
“Jo nuk e kemi pranu, nuk ka ardhur as urdhëresa, as nuk ka ardhur pacienti. Edhe me ardhë momentalisht nuk kemi vend, duhet me pritë disa ditë deri të i bëhet vendi”, kanë thënë nga kjo klinike.
Ndryshe, Policia e Kosovës ka arrestuar të hënën Valentiono Corleone pasi i njëjti u denoncua nga babai i tij për dhunë në familje.
Me vendim të prokurorit ai u ndalua për 48 orë.
“Është arrestuar i dyshuari mashkull kosovar pasi që i njëjti ka kanosur babain e tij viktimën mashkull kosovar. I dyshuari në vazhdimësi shkakton dhunë në familje duke i kanosë prindërit e tij dhe të njëjtit ndihen të rrezikuar prej tij .Me vendim të prokurorit i dyshuari dërgohet në mbajtje”, thuhet në njoftimin e Policisë së Kosovës.
Ai ishte arrestuar edhe më parë për dhunë në familje pasi kishte kanosur prindërit.
