Universiteti i Prishtinës “Hasan Prishtina” ka njoftuar se ka ndërruar jetë profesori i Departamentit të Filozofisë, Kadri Metaj.
Siç bëhet e ditur në njoftimin mortor, Prof. Dr. Kadri Metaj ka qenë një nga profesorët më të shquar të Universitetit të Prishtinës, duke shërbyer me pasion dhe dedikim në fushën e filozofisë për rreth 45 vite.
“Me kontributin e tij të madh dhe të gjatë, ai ka ndikuar thellë në zhvillimin dhe avancimin e filozofisë dhe mendimit filozofik në Kosovë dhe më gjerë, kudo ka shqiptar, duke përfshirë, por pa u kufizuar në Universitetin e Tiranës, Universitetin e Tetovës etj”, thuhet në njoftim.
Si pedagog, Prof. Dr. Kadri Metaj ka ndihmuar dhe frymëzuar breza të tërë studentësh, duke i udhëzuar ata drejt njohurive filozofike dhe zhvillimit të mendimit kritik.
“Gjithashtu, ai ka lënë një ndikim të madh në filozofi, art, kulturë etj., përmes ligjërimeve, publikimeve dhe paraqitjeve të tij shkencore dhe kërkimeve të thelluara akademike”.
“Me largimin e tij nga kjo jetë, humbja është e ndjeshme për studentët, komunitetin filozofik, akademik dhe shoqërinë kosovare në përgjithësi. Ndihemi të privilegjuar që kemi pasur fatin të punojmë dhe të mësojmë nga Prof. Dr. Kadri Metal”, thuhet mes tjerash.
Familjarëve dhe miqve të Prof. Dr. Kadri Metajt, të cilët po përjetojnë një moment të vështirë, UP-ja iu ka shprehur ngushëllimet më të thella.
“Jeta dhe vepra e tij do të mbeten një kujtim i shenjtë për të gjithë ne. Me respekt dhe nderim të thellë, Departamenti i Filozofisë”.
