Ish-këngëtarja dhe prezantuesja e RTK-së, Lola Haradinaj, ka festuar të hënën ditëlindjen e saj.
Ajo ka treguar disa herë në intervista se e ka pasur shumë në qejf muzikën, por që bashkëshorti i saj e kishte inkurajuar që të mos merret me art.
“Unë kur e kam njohur Dautin dhe kur më telefononte nga burgu, unë edhe këndoja nganjëherë, dhe thoja: ‘Kur të del Dauti nga burgu do të më përkrahë’, që të arrij sukseset në majat e muzikës, për të qenë ylli i radhës sepse e meritoja, jo për gjë. Por megjithatë, Dauti kur doli tha: ‘Çika e mirë, këndo veç për mua nganjëherë’! Megjithatë unë s’jam pishman për jetën që kam dhe për statusin që kam”, kishte deklaruar ajo para dy viteve në emisionin “Divers” të RTK-së.
Por mesa duket nostalgjia për të kënduar është ende brenda Lolës dhe duket se ajo e theu akullin pas shumë viteve në festën e ditëlindjes së saj.
Kjo pasi në disa video të publikuar në rrjetet sociale nga festa e saj e ditëlindjes, Lola mund të shihet teksa kapur mikrofonin dhe ka kënduar disa vargje të një kënde, të cilën e kishte nisur ta këndonte këngëtari Egzon Pireci, që ishte ftuar të performonte për publikun.
