Kur Aretha Franklin vdiq nga kanceri i pankreasit në gusht të vitit 2018, mendohej se ajo nuk kishte lënë pas asnjë testament për pasurinë e saj prej miliona dollarësh.
Por muaj më vonë, testamentet e shkruara me dorë u gjetën në një sirtar dhe nën një divan në shtëpinë e saj në periferi të Detroit, Michigan. Një grup gjykatësish tani do të përcaktojë se cili nga dy dokumentet duhet të konsiderohet si testamenti i fundit i vlefshëm i artistes.
Gjyqi filloi të hënën dhe pritet të zgjasë më pak se një javë. Dëshmitarë do të jenë fëmijët e Franklin, mbesa e saj Sabrina Owens dhe një eksperte të shkrimit të dorës.
Këngëtarja ishte shumë private në lidhje me financat e saj dhe thuhet se i ka rezistuar përgatitjes së një testamenti zyrtar pavarësisht se ishte e sëmurë prej vitesh.
Kur ajo vdiq në moshën 76-vjeçare, mungesa e një testamenti nënkuptonte se pasuritë e saj – duke përfshirë shtëpitë, makinat, peliçet dhe bizhuteritë – do të ndaheshin në mënyrë të barabartë mes katër djemve të saj.
Por nëntë muaj pas vdekjes, testamentet u gjetën në shtëpinë e saj. Njëri nga djemtë pretendon se letrat e qershorit 2010, të gjetura brenda një sirtari të mbyllur janë vullneti i vërtetë.
Dy djem të tjerë thonë se një testament i marsit 2014 dhe i gjetur në një fletore spirale nën jastëkët e divanit duhet të ketë përparësi.
Pavarësisht dallimeve të tyre, të dy dokumentet kërkojnë që djemtë të ndajnë të ardhurat nga muzika dhe të drejtat e autorit të Franklin. Çdo version ishte i shkarravitur me dorë dhe i vështirë për t’u deshifruar, me fjalë të fshira dhe shënime të shumta.
Një gjendje e tillë do t’i bënte ato të papranueshme në shumicën e shteteve, por ligji i Miçiganit i lejon testamentet e shkruara me dorë për sa kohë që ato plotësojnë kritere të tjera.
Theodore White II – fëmija i tretë i Franklin, nga martesa e saj e shkurtër me ish-menaxherin e saj – argumenton se dokumenti i noterizuar prej 11 faqesh nga viti 2010 është testamenti i vlefshëm.
Ai version e liston atë si bashkëekzekutues ose përfaqësues personal në pasuri, së bashku me mbesën e artistes.
Ndërkohë, Kecalf dhe Edward, djemtë e tjerë, argumentojnë se versioni i vitit 2014 është vullneti kryesor i nënës së tyre.
