Studentët e UP-së e përfaqësojnë Kosovën në stazhin e qendrave frankofone në Francë - Bota Sot
Studentët e UP-së e përfaqësojnë Kosovën në stazhin e qendrave frankofone në Francë

Ndryshe

Studentët e UP-së e përfaqësojnë Kosovën në stazhin e qendrave frankofone në Francë

Më: 15 nëntor 2019 Në ora: 13:30
Pamje nga ngjarja

Desantila Muriqi, Elsa Hyseni dhe Kurbin Shala, studentë të Departamentit të Frëngjishtes në Fakultetin e Filologjisë të Universitetit të Prishtinës “Hasan Prishtina”, e përfaqësuan Kosovën në mesin e 33 shteteve në stazhin njëmujor të qendrave ndërkombëtare frankofone në Francë.

Këta studentë, së bashku me të rinjtë e vendeve të tjera të botës, udhëtuan në shtatë qendra të ndryshme të Francës, rrugëtim i cili iu mundësoi të përfitojnë përvojë të paharruar e miq të rinj, të eksplorojnë Francën dhe kulturën e këtij shteti dhe ta perfeksionojnë gjuhën frënge.

Të tre studentët morën mbi supe detyrën e ambasadorit të Kosovës në këtë organizim, duke bërë që të rinjtë pjesëmarrës të dëgjojnë për herë të parë për emrin Kosovë. E për këtë Desantila thotë se ishte e lumtur.

“Në fillim nuk e kishin idenë se ku ndodhet Kosova, por pastaj e mësuan dhe ndihesha shumë e lumtur kur i shihja të interesuar, kur vallëzonim së bashku Shotën, kur dëshironin të mësonin fjalë në gjuhën tonë të bukur dhe kur iu pëlqente shija e leqenikut me speca me mazë”, rrëfeu Desantila.

Ndërkaq, për Kurbinin kjo vizitë paraqet eksperiencën më të kuptimtë të krijimit të tij individual dhe kulturor.

“Kjo vizitë ka ndikuar në pjekjen time emocionale dhe ngritjen intelektuale. Ky stazh më ka ndihmuar të kuptoj se sa të njëjtë jemi ne të rinjtë, edhe pse vijmë nga vende të ndryshme, raca e religjione të ndryshme, apo që jetojmë larg. Kjo më ka bërë t’i harroj paragjykimet ndaj shumë nacionaliteteve të ndryshme dhe të krijoj shumë lidhje të reja miqësie”, tha ai.

Këtë vizitë Elsa e konsideron si përvojën më përfituese që ka pasur ndonjëherë. “Jo vetëm se kam mësuar për traditat, zakonet, këngët e vallëzimet e Francës dhe shteteve të tjera, por kam mësuar edhe ëndrrat, shqetësimet e shpresat e të rinjve anë e mbanë botës, të cilat na kanë afruar më shumë me njëri-tjetrin. Pasi që kam pasur një përgjegjësi më të madhe sesa pjesëmarrësit, kam mësuar edhe se si ta menaxhoj një grup, si të bëj provë autoriteti dhe në të njëjtën kohë t'u përshtatem kërkesave të secilit”, tha ajo.

Ky organizim është mundësuar nga Qendrat Frankofone Ndërkombëtare dhe është financuar nga Klubi Lions i Francës, i cili synoi lidhjen e miqësisë në mes të të rinjve frankofonë kudo nëpër botë. Pjesëmarrja e studentëve tanë është realizuar nga Qendra Universitare Frankofone në UP.

Shfaq komentet
comments powered by Disqus
Sot mund të lexoni Shfletoni kopertinat