Një burrë ka përshkruar tronditjen e tij kur u kthye në shtëpinë e tij dhe e gjeti atë të zhveshur nga të gjitha orenditë pasi u shit pa dijeninë e tij.
Sipas mediave të huaja, pasi u lajmërua nga fqinjët, Mike Hall shkoi me makinë në Luton, Angli dhe gjeti dikë duke punuar dhe një pronar të ri që tha se kishte blerë shtëpinë.
Një hetim i BBC zbuloi se identiteti i zotit Hall ishte vjedhur dhe ishte përdorur për të shitur shtëpinë dhe për të bankuar të ardhurat.
Policia fillimisht i tha se nuk ishte mashtrim por tani po heton një gjë të tillë.
Zoti Hall, i cili ishte larg pronës dhe punonte në Uellsin verior, tha se ai mori një telefonatë nga fqinjët e tij më 20 gusht, duke thënë se dikush ishte në shtëpi dhe të gjitha dritat ishin ndezur.
Të nesërmen në mëngjes, ai udhëtoi për atje.
“Shkova te dera e përparme, provova çelësin tim në derën e përparme, nuk funksionoi dhe një burrë ma hapi derën e përparme”, tha ai për BBC.
“E shtyva në një anë dhe u futa në pronë, vërtet nuk e dija se çfarë po bënte atje”.
“Tronditja e parë ishte kur pash shtëpinë e zhveshur plotësisht nga mobiljet; të gjitha orenditë, qilimat, perdet – gjithçka – ishte jashtë pronës”.
Burri tha se ishte duke bërë punë ndërtimi, për të cilën zoti Hall u përgjigj: “Unë nuk e kam shitur shtëpinë. Kjo është ende prona ime”.
Zoti Hall telefonoi policinë, por ndërtuesi u largua dhe u kthye me babain e pronarit të ri, i cili tha se kishte blerë shtëpinë me tarracën në korrik, duke shtuar: “Tani është prona ime. Dilni”.
Zoti Hall tha: “Më pas ne u përpoqëm të hynim në dokumentacionin e Regjistrit të Tokës në internet për të zbuluar se emri i kujt shfaqej… dhe në fakt, që nga 4 gushti, është emri i këtij njeriu”.
“Në atë moment policia tha: ‘Epo, nuk mund të bëjmë asgjë më tej këtu. Kjo është një çështje civile; ju duhet të dilni nga shtëpia dhe të kontaktoni avokatët tuaj'”.
Më pas ai u përpoq të kontaktonte policinë në internet, por mori të njëjtën përgjigje.
