MPJ mohon se Zyrtari Ndërlidhës i Serbisë përballet me pengesa - Bota Sot
MPJ mohon se Zyrtari Ndërlidhës i Serbisë përballet me pengesa

Aktuale

MPJ mohon se Zyrtari Ndërlidhës i Serbisë përballet me pengesa

Më: 28 nëntor 2018 Në ora: 11:10
Behgjet Pacolli

Ministria e Punëve të Jashtme e Republikës së Kosovës përmes një kumtese për media i ka hedhur poshtë dhe i ka vlerësuar si tërësisht të pavërteta, të papërgjegjshme dhe të papranueshme deklaratat e Institucioneve shtetërore të Republikës së Serbisë në lidhje me pretendimet për pengesat, të cilat sipas Serbisë, Zyrtari Ndërlidhës i Serbisë i ka hasur gjatë kryerjes së obligimeve në Kosovë.

“Ministria e Punëve të Jashtme sipas informacioneve të saj të siguruara nga Institucionet përgjegjëse të linjës rikonfirmon se Zyrtari Ndërlidhës i Republikës së Serbisë në Republikën e Kosovës nuk ka pasur asnjë pengesë dhe vështirësi në ushtrimin e detyrave dhe përgjegjësive të tij, ashtu siç përcaktohen me Marrëveshjen e Brukselit. Ministria e Punëve të Jashtme vlerëson punën, rolin dhe angazhimin konstruktiv të Zyrtarëve Ndërlidhës, të cilët që nga emërimi i tyre kanë kontribuar në zhvillimin e një komunikimi të mirëfilltë në mes të Institucioneve të të dyja shteteve dhe në mbështetje të kësaj inkurajon zgjerimin e fushëveprimit të tyre”, thuhet në njoftimin e MPJ-së.

Për më tepër, sa i përket pretendimeve dhe akuzave të pabaza për mos përmbushje të detyrave, që rrjedhin nga Marrëveshja e Brukselit për Zyrat Ndërlidhëse, Ministria e Punëve të Jashtme thekson se Policia e Republikës së Kosovës do të jetë në kohën dhe vendin e caktuar nga Zyrtari Ndërlidhës i Republikës së Serbisë dhe do t’i përmbushë detyrat dhe obligimet e veta me profesionalizëm, përkushtim dhe përgjegjësi të lartë, ashtu siç ka vepruar çdoherë deri më tash.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...