Kremlini po paguan një çmim të lartë me publikuar bisedën mes oficerëve gjermanë. Kjo tregon se sa e përkushtuar është Rusia për të parandaluar dërgimin e raketës Taurus.
Gjermania është në shok. Dhe për këtë arsye bën gjënë e gabuar - domethënë, pikërisht atë që synonte Vladimir Putin duke publikuar procesverbalin e bisedës së udhëheqjes së forcave ajrore gjermane.
Përpara se "skandali" të bëhej i njohur, presioni mbi Olaf Scholz ishte rritur në nivel kombëtar dhe ndërkombëtar për të furnizuar me raketat Taurus Ukrainën. Tani Gjermania ka një temë të re – aferën e përgjimeve.
Ajo e shtyn temën aktuale, dërgesa e raketave është fokusi. Dhe kjo është arsyeja pse presioni mbi kancelarin për të dorëzuar raketat e lundrimit shumë efektiv në Kiev po zvogëlohet përsëri. Pra, llogaritjet e Putinit po funksionojnë.
Skandali nuk duhet ta ndalë vendimin mbi dorëzimin e Taurusit
Sigurisht, është jashtëzakonisht e turpshme që udhëheqja e njësisë ajrore mund të përgjohej kaq lehtë, gjatë bisedës së tyre për raketat. Natyrisht që rrethanat duhet të sqarohen dhe të nxirren pasoja.
Por kjo nuk duhet të jetë një arsye për të ndaluar debatin shumë më të rëndësishëm nëse dhe për çfarë qëllimi Gjermania duhet t'i japë raketat Ukrainës. Dy arsyet hulumtuese dhe vendimtare nga afera e përgjimeve janë: Së pari, Putini ka vërtet frikë nga Taurus. Së dyti, kancelari nuk po i tregon publikut të vërtetën për arsyet e tij për mosdorëzimin e raketave.
Pse e frikëson Putinin, Taurusi
Së pari për vlerën e Taurus në sytë e Putinit. Për ta bërë këtë, duhet të keni parasysh se si veprojnë normalisht shërbimet sekrete dhe pse publikimi i procesverbalit të bisedës është i pazakontë.
Shërbimet sekrete zakonisht e mbajnë sekret një depërtim të tillë në sistemet e informacionit të armikut. Qëllimi juaj është të kapni edhe të keni më shumë njohuri. Nëse armiku mëson se ata janë përgjuar, nuk do të duhet shumë kohë që rrjedhja të gjendet dhe të mbyllet.
Pra, Putini po paguan një çmim të lartë duke publikuar bisedën mes oficerëve gjermanë. Ai po ua mohon shërbimeve të tij mundësinë që në këtë mënyrë, të spiunojnë edhe më tutje Bundeswehr-in.
Destinacioni është Ura e Kerçit (Krimesë)
Anasjelltas, Putini po zbulon se sa e rëndësishme është për të që Ukraina të mos furnizohet me raketat Taurus. Shefi i Kremlinit Putini padyshim se ka shumë frikë nga kjo armë. Dhe para së gjithash, kjo tregon mundësinë se si kjo armë do mund të ndryshojë rrjedhën e luftës në Ukrainë.
Taurus mund të shkatërrojë rrugën më të rëndësishme të furnizimit për trupat ruse në Ukrainën e pushtuar juglindore: Urën e Kerçit. Nëse nga kjo rrugë ndërpritet transporti, Rusia do të duhej të hiqte dorë herët a vonë nga Krimea.
Këtë e dinë edhe kancelari dhe këshilltarët e tij më të afërt. Pra, nëse Scholz mbetet kaq kokëfortë në refuzimin e tij për të dorëzuar Taurus – ët Ukrainës, kuptohet sikur ka fyer publikun me arsye gjysmë të vërteta apo edhe false për një kohë të gjatë, kjo do të thotë se ai nuk dëshiron të kontribuojë që Putini të lirojë shpejt vendet e okupuara, duke përfshirë edhe Krimenë. Edhe pse një sukses i tillë, do të shpëtonte shumë jetë ukrainase.
Politikanët e opozitës si oficeri rezervë Roderich Kieswetter e kanë bërë këtë akuzë prej kohësh. Ndërkohë, partnerët e koalicionit si kryetarja liberale e Komitetit të Mbrojtjes, Marie-Agnes Strack-Zimmermann dhe kolegu i saj i Gjelbër Anton Hofreiter e kanë bërë të qartë gjithashtu se, nga këndvështrimi i tyre, kancelari nuk po e thotë të vërtetën.
Olaf Scholz po e shtrembëron të vërtetën
Nuk është e vërtetë, për shembull, që ushtarët e Bundeswehr-it do të duhej të ishin në Ukrainë për të kryer operacionin me Taurus. Nuk është gjithashtu e vërtetë që Gjermania përballet me një konsideratë të ndryshme nga ajo britanike apo franceze, nëse ata mund t'u japin ukrainasve armë të tilla me kushte dhe besim se ata do t'u përmbahen atyre. Britanikët dhe francezët kanë furnizuar Kievin me raketat e tyre të lundrimit për muaj të tërë.
Ai nuk u thotë qytetarëve se çfarë gjoja e pengon kancelarin, të dorëzojë raketat Taurus. Ai ka këshilltarët e tij që ta shpërndajnë atë në diskutime konfidenciale në mënyrë që të gjejë rrugën e saj në media, por ai nuk mund të citohet.
Scholz dyshohet se ka frikë se Putini, pas dorëzimit të Taurusëve, do ta cilësoj Gjermaninë si pjesëmarrëse në luftë dhe do ta kërcënohej nga Putini me armët bërthamore. Ndryshe nga britanikët dhe francezët, Gjermania nuk ka armët e saj bërthamore si parandalues.
Nëse kancelari do ta bënte vërtet atë llogaritje, nëse ai nuk do të donte të furnizonte Ukrainën me raketa të tilla, nga frika e kërcënimeve bërthamore ruse kundër Gjermanisë dhe - në përgjithësi - të mohonte fitoren e Ukrainës, atëherë kjo do të ishte edhe më shqetësuese.
Përmes pjesëmarrjes së saj në armët bërthamore amerikane, Gjermania është pjesë e një sistemi parandalues, që është dukshëm më i mirë se arsenali britanik dhe francez .
Dhe: Nëse një Kancelar Federal i përkulet një kërcënimi bërthamor rus qoftë edhe një herë, ai do ta bëjë vendin tonë përgjithmonë të prekshëm, ndaj shantazheve bërthamore. Në fund të fundit skandali i përgjimeve është një arsye më shumë, për të furnizuar së shpejti Ukrainën me raketat Taurus.
Nga Christoph von Marschall, Nga Gjermanishtja: Sherif Ramabaja
