Sot në Kosovë janë duke u mbajtur zgjedhjet e jashtëzakonshme parlamentare. Deri më tani mbi gjysmë milioni votues e kanë kryer obligimin qytetar duke votuar. Përgjatë ditës së sotme ka pasur edhe parregullsi nëpër qytete të ndryshme të Kosovës.
Zëdhënësi i Prokurorisë Themelore në Pejë, Shkodran Nikçi, ka treguar se cilat ishin disa nga rastet të cilat kanë ndodhur sot në rajonin e Pejës.
“Në rajonin e Pejës janë caktuar 15 prokurorë të cilët kanë përcjellur mbarëvajtjen e procesit zgjedhor. Kanë ndodhur disa raste, fillimisht në orët e hershme të mëngjesit një komisioner e ka fotografuar votën dhe e ka plasuar në rrjete sociale, ai është shoqëruar në polici. “Në shkollën “8 Marsi” një qytetar ka fotografuar votën, i njëjti është shoqëruar në polici. Në Klinë një komisioner dhe një votues janë arrestuar, janë dërguar në mbajtje për 48 orë. Në përgjithësi ka qenë situatë e qetë”, ka thënë Nikçi për T7.
