Ka një muaj që postin e presidentit të Kosovës, po e ushtron kryetarja e Kuvendit Vjosa Osmani, pas dorëheqjes së ish-presidentit Hashim Thaçi.
Ndërkohë, që partitë politike ende nuk janë afër konsensusit për të zgjedhur dikë në këtë pozitë.
E për këtë kryeministri i vendit Avdullah Hoti ditë më parë, ka paralajmëruar një tryezë që pritet t’i mbledhë të gjitha partitë politike për çështjen e presidentit.
Bunjaku-Rexhepi: LDK e gatshme të shkoj në zgjedhje
Deputetja e Kuvendit të Kosovës nga radhët e LDK-së, Valentina Bunjaku-Rexhepi ka thënë për gazetën “Bota sot”, se sa i përket presidentit, LDK-ja e ka shpallur vullnetin e saj.
“Ne si LDK kemi shpreh vullnetin tonë që të ulemi me partitë e përfaqësuara në Kuvend dhe të diskutojmë për zgjidhjen opcionale. Ju e dini që Kushtetuta e vendit është specifike sa i përket mënyrës se si zgjidhet Presidenti dhe Kuvendi duhet të ketë 80 deputetë prezentë që të zgjedhë presidentin e ri dhe kjo kërkon konsensus thuajse të të gjitha grupeve parlamentare në Kuvend”, ka thënë deputetja Bunjaku-Rexhepi.
Sipas saj kryeministri Hoti, ka iniciuar një tryezë për konsultime dhe diskutime me të gjitha partitë politike për të parë mundësinë e zgjedhjes së presidentit.
“Mirëpo dihet tanimë që AAK ka një kandidat të propozuar për president dhe deri në tani nuk ka lëvizur nga pozicioni i tyre. Ndërkohë, edhe PDK ka bërë publike qëndrimin e vet së fundi se ata nuk japin vota për presidentin e ri pos nëse kandidati është nga PDK. Ne si LDK jemi të interesuar të gjejmë zgjidhjen e duhur dhe në interes të Kosovës dhe ky qëndrim yni nuk reflekton shmangieje nga zgjedhjet e jashtëzakonshme assesi. Ne jemi të gatshëm të shkojmë në zgjedhje kurdo që ato vijnë sepse ne jemi parti institucionaliste dhe zgjedhjet e lira dhe fer i shohim si konsolidim të demokracisë ne vend”, ka thënë deputetja Bunjaku-Rexhepi.
Bajqinovci: Janë vet PDK-LDK-AAK që nuk po pajtohen për presidentin
Kurse deputeti i VV-së, Mefail Bajqinovci ka thënë se rreth këtij takimit janë vet PDK-LDK-AAK të cilat nuk po pajtohen për presidentin.
Sipas tij, të gjitha po e kërkojnë presidentin sipas preferencave te tyre.
“Ata kanë nevojë për tryeza të diskutimit e jo ne si VV. Ne po themi që presidenti nuk i takon askujt. Vendi duhet të shkojë ne zgjedhje, dhe kuvendi i ri të diskutojë për kriteret përcaktuese, për zgjedhjen e presidentit të ardhshëm - e që do të duhej të ishte unifikues. Propozimet që i kemi dëgjuar deri më tani, së pari janë figura jo unifikuese, e së dyti janë propozime jo kushtetuese, sepse po kërkojnë që presidenti të jetë partiak”, ka thënë deputeti Bajqinovci.
Ai konsideron se është partia e AAK-së ajo e cila me këmbëngulje thotë se ajo tashmë ka kandidatin e saj dhe nuk përkrahë̈ ndonjë̈ tjetër,derisa nga PDK-ja thonë se nuk kanë votë për ndonjë̈ kandidat tjetër pos nga radhës e saja, kurse LDK thotë̈ se ky institucion i takon PDK-së.
“Pra të gjitha subjektet, në përjashtim të LV-së, unitetin për presidentin e radhës po e kushtëzojnë̈ më kandidatin e tyre dhe nuk marrim pjesë”, ka thënë deputeti i VV-së Mefail Bajqinovci.
Gazeta “Bota sot” ka tentuar të marr përgjigje edhe nga partia PDK, dhe AAK, por asnjëra nuk është përgjigjur rreth kësaj çështje.