Kryetari i Prishtinës, Përparim Rama bashkë me përfaqësuesit e veteranëve të UÇK-së dhe familjarë të familjeve të dëshmorëve, ndezën sonte në Prishtinë flakadanët për të shënuar natën e zjarreve, në shenjë solidarizimi me ndezjen e flakadanëve në të gjitha rajonet, duke përmbyllur kështu manifestimin në përkujtim të “Epopesë së UÇK-së”.
Kryetari i kryeqytetit, Përparim Rama përmes ndezjes së flakadanëve kujtoi familjen Jashari si një familje që është flijuar për lirinë e popullit. Ai tha se ky organizim do të bëhet traditë dhe do të madhërohet edhe më shumë.
Rama: Ndezja e flakadanëve do të madhërohet çdo vit
"Kjo është një shenjë nderi e respekti për familjen e madhe Jashari, të cilët e kanë flijuar jetën e tyre që ne sot të festojmë lirinë. Është një organizim që e kemi bërë vitin e kaluar dhe prej tash e tutje do të jetë organizim për çdo vit dhe patjetër se çdo vit do të madhërohet edhe më shumë për ta nderuar sakrificën e familjes Jashari, për të nderuar të gjithë ata që kanë dhënë jetën për lirinë e vendit tonë", tha ai.
Rama tha se përmes disa prezantimeve të bëra e që i kanë paraqitur në letra në sheshin "Skenderbeu", njerëzit mund të mësojnë më shumë për historinë e popullit të Kosovës që nga viti 90-të e deri në luftë.
Kryetari i Shoqatës për familje të dëshmorëve të Prishtinës, Naser Pacolli kujtoi gjithë dëshmorët e rënë për liri.
Pacolli e vlerësoi figurën e komandantit legjendar, Adem Jashari, si një figurë përmes së cilës është sjellur liria.
Pacolli: Me rënine e Adem Jasharit, populli i është bashkangjitur masivisht UÇK-së
"Sot në 25-vjetorin e Epopesë së UÇK-së në shenjë simbolike kemi vendosur së bashku me Komunën e Prishtinës që të bëhet ndezja e zjarreve, e cila para 25 viteve ka shërbyer si masivizim i UÇK-së. Me rënien e komandantit legjendar, Adem Jasharit, populli jonë i është bashkangjitur masivisht UÇK-së. Përkujtojmë të gjithë dëshmorët e rënë për lirinë e Kosovës", tha Pacolli.
Ndryshe, në kuadër të shënimit të “Epopesë së UÇK-së”, sonte po mbahet nata e zjarreve edhe në Prekaz.
