Shërbimi Korrektues i Kosovës (SHKK), njoftoi të enjten se është arritur që të parandalohet futja e kontrabandës në Qendrën e Paraburgimit në Prishtinë.
Sipas njoftimit, oficerët korrektues gjatë bastisjes së zonave të brendshme të perimetrit rrethues dhe gjatë kontrollimit, tek zona gashtë është vërejtur një qese e zezë e dyshimtë, e cila ishte në pjesën e epërme të murit të qendrës.
“I menjëhershëm ka qenë reagimi i oficerëve korrektues, me ç‘rast kanë lokalizuar qesen e dyshimtë dhe gjatë hapjes është konstatuar se në brendësi të saj kanë qenë katër telefona Iphone me kamerë pa kartelë, një telefon Samsung me kamerë pa kartelë; një telefon NOKIA pa kartelë; dy koka mbushëse; dhe gjashtë kabllo mbushëse”, thuhet në komunikatën për media.
Lidhur me rastin është njoftuar Policia e Kosovës, ndërsa janë iniciuar procedurat tjera sipas rregullores.
“Shërbimi Korrektues i Kosovës mbetet i përkushtuar në luftimin kontrabandës brenda institucioneve korrektuese dhe asnjëherë nuk do të qëndrojë duarkryq përballë këtyre dukurive negative të cilat rrezikojnë rendin dhe sigurinë e saj”.
