Komuna e Prishtinës ka paralajmëruar se kryeqyteti do të vlojë nga punimet në terren, duke bërë të ditur se kanë filluar 25 projekte, pasi i janë liruar mjetet e të hyrave vetanake. E lidhur me këto projekte në një intervistë për lajmet qendrore në RTK ka folur i pari i kryeqytetit, Përparim Rama.
“Pjesa e ‘Kalabrisë’ ka qenë një projekt që është shumë i nevojshëm sepse ka pasur probleme të mëdha për qytetaret në aspektin e sigurisë, kundërmimit dhe shumë tjera. Rruga ‘Ukshin Hoti’ në pjesën e brendshme të qendrës së qytetit tash po zgjerohet do të bëhet me katër korsi, gjë që do ta mundësojë një lëvizje më të lirshme të trafikut. Po ashtu kemi unazën e brendshme në të cilën janë duke vazhduar punimet me një intensitet të shtuar”, tha Rama.
Ai tutje tha se është një numër i madh i shkollave që janë duke u ndërtuar, derisa tregoi se kanë formuar ekipe të monitorimit në pesë zona.
“E kemi ndarë Prishtinën në pesë zona dhe i kemi pesë ekipe të cilat do t’i monitorojnë të gjitha ndërtimet e rrugëve dhe nevojat e tyre si dhe problemet e mëhershme që kanë qenë. Të gjitha do rregullohen. Tash kemi ndarë 1 milion euro për ‘Kodrën e Trimave’. Përveç se në këtë pjesë jemi duke punuar në urbanizëm, jemi duke punuar edhe në aspektin ligjor, në pjesën e pronësisë sepse ka numër të madh të objekteve që janë të ndërtuara në tokën e komunës dhe këtë duhet ta zgjedhim sepse është problem që nuk është zgjidhur me dekada”, tha tutje Rama.
I pari i kryeqytetit më pas ka njoftuar se Banka për Zhvillim Ekonomik e ka paguar fizibilitetin e zonës te Tregu i Gjelbër.
“Ky është një projekt madhor për kryeqytetin dhe tashmë e kemi përfunduar fazën e fizibilitetit dhe po ashtu edhe takimet me tregtarë dhe qytetarë të kësaj pjese. Tregtarët do të kalojnë në zonën e AKP-së. Aty është një park i mrekullueshëm. Ka qenë një projekt i mëparshëm në bazë të cilit është paraparë që të prehen ata drunj të mrekullueshëm por ne e kemi ndaluar këtë. Ne thjesht e kemi bërë një plan dhe nuk do të dëmtohen as drunjtë dhe as parku”, tha Rama.
Në fund, kryetari i Komunës së Prishtinës premtoi se do të pastrohet edhe hapësira për rreth RTK-së, e cila tash e disa ditë është në gjendje të rëndë dhe kundërmon.
