Kryetari i Prishtinës, Përparim Rama, gjatë vizitës në Japoni ka takuar arkitektin e njohur botëror, Kengo Kuma, me të cilin kanë diskutuar detajet e fundit të projektit të Sallës Koncertale dhe Muzeut të Artit në kryeqytet, ka njoftuar Komuna e Prishtinës.
Rama ka thënë se arkitektura unike e ndërtesës ikonë të kryeqytetit, do të ruhet tërësisht si pjesë e trashëgimisë “por në të njëjtën kohë ne do të krijojmë një Sallë Koncertale e Muze të Artit super modern”.
Ai ka thënë se ky është një projekt tjetër i madh drejt transformimit të Prishtinës.
"Jam shumë i lumtur që vetëm se po hedhim hapat e parë për krijimin e dy hapësirave të rëndësishme të kulturës që i kanë munguar Kryeqytetit tash e sa kohë. Ne po realizojmë një kërkesë të kahmotshme të artistëve tanë, që të kenë një ambient të përshtatshëm ku do të mund të shprehin artin e tyre, në kushte shumë më të favorshme, ashtu siç do të bëjnë artistët me renome botërore. E kam premtuar dhe po e bëjë realitet”, ka thënë Rama.
Në njoftim është theksuar se arkitekti Kengo Kuma, u shpreh falënderues për mundësinë e bashkëpunimit me kryeqytetin që të krijojë një projekt me arkitekturë të veçantë, i cili do të plotësojë nevojat e komunitetit artistik vendor e ndërkombëtar.
Salla Koncertale dhe Muzeu i Artit në kryeqytet pritet të krijohen brenda ish-shtëpisë së mallrave “Gërmia” në Prishtinë.
