Për shkak të reshjeve të shiut, një numër i vogël qytetarësh në Prishtinë kanë dalë sonte për të vazhduar kremtimin e festave të nëntorit. Po ashtu, për shkak të motit me reshje të vazhdueshme shiu është anuluar koncerti i paraparë në sheshin "Shatërvan" në Prizren, në orën 19:00.
28 nëntori, Dita e Flamurit Kombëtar, në kryeqytet u mbajt përkundër kushteve jo të mira atmosferike. Disa nga qytetarët shprehen të lumtur që sot shqiptarët si komb po e festojnë këtë ditë, e disa të tjerë janë të pakënaqur me numrin e vogël të aktiviteteve festive të organizuara nga komuna e Prishtinës në këtë ditë feste.
Qytetari Ismail Mustafa uron festën e 28 nëntorit për të gjithë diasporën duke thënë se populli shqiptar e meriton lirinë që e gëzon sot. Ai thotë se krenohet me flamurin shtetëror të Kosovës, por se në zemrën e tij është flamuri me shqiponjë.
Mustafa: Urime 28 Nëntori për diasporën, shpresoj të na prijë e mbara
“Urimi im është për 28 nëntorin. Ju uroj fëmijëve që i kam në diasporë të gjithëve 28 Nëntorin, të gjithë popullit shqiptar kudo që janë në botë. Shpresoj të na prijë e mbara. Qysh nuk e kanë merituar! Shekuj e shekuj, e dimë mirë që na kanë mbajtur sundimi osman. Të gjitha këto që kanë qenë beteja që kanë qenë ndaj okupatorëve. Gjithmonë ky popull, faktikisht, kemi për ta festuar Ditën e Flamurit, Ditën Kombëtare. Me hartë (flet për flamurin e Kosovës) është flamur që na u ka imponuar për shtet dhe të kemi shtetin me të dhe krenohemi që e kemi shtetin me të. Sa i përket flamurit kombëtar, nuk ka të bëjë me flamurin shtetëror dhe do të mbetet kombëtare siç thonë dem-baba-dem," tha Mustafa.
Për të kremtuar këtë ditë të madhe në Kosovë kishte ardhur nga Italia edhe Roberti, i cili nuk deshi të bëjë të ditur mbiemrin. Ai, megjithatë, shprehet i pakënaqur me organizimin festiv të nga na e komunës së Prishtinës.
Roberti: Erdha nga Italia për të festuar, në Prishtinë mungon organizimi festiv
“Urime për popullin shqiptar që të kalojë sa më mirë. Kjo është dëshira ime për të gjithë shqiptarët. Kam menduar se bëhet më mirë, por nuk ka as festë as asnjë gjë. Kam ardhur nga jashtë, por nuk kam çfarë të bëj. Unë kam pritur që ndonjë organizim, por nuk ka asgjë," tha Roberti.
Një qytetar tjetër që nuk deshi të identifikohej uron që 28 nëntorët e tjerë populli i Kosovës të jetë i bashkuar me Shqipërinë.
Qytetari: Uroj që populli shqiptar të bashkohet me Shqipërinë
“Mjafton që jemi unikë, e me unitetet mbërrijmë fitore të madh, por duhet kohë. Mendoj që për 28 nëntorët e ardhshëm do të kemi sukses për bashkim. Vetëm pak me pikëpyetje dhe kjo do të përfundojë,” tha qytetari.
Pavarësisht reshjeve të shiut në orët e mbrëmjes, Festës së Flamurit Kombëtar iu janë bashkëngjitur edhe të rinjtë.
Qytetari: Prishtina duhet të kishte organizuar festë për 28 nëntorin
“Urime të gjitha shqiptarisë, çka me thënë tjetër, kemi dalë me shokë. Mirëpo, pak koha me shi. Normal duhej organizuar diçka më ekstra, sepse është ditë e madhe kjo", u shpreh ai.
Ndryshe, për shkak të motit me reshje të vazhdueshme shiu është anuluar koncerti i paraparë në sheshin "Shatërvan" në Prizren, në orën 19:00. Koncerti do të mbahet disa ditë më vonë, bazuar në kushtet e favorshme atmosferike.
