Në një laborator në Mançester, vullnetarët po vendosin maska për të marrë frymë nga ajri i ndotur.
Ata janë duke u ekspozuar ndaj llojeve të ndryshme të tymit, nga nafta te produktet e pastrimit, në një përpjekje për të kuptuar se si ndotja ndikon në tru, shkruan BBC, transmeton Klankosova.tv.
Shkencëtarët po analizojnë mostrat e gjakut dhe rezultatet e testeve njohëse të marra para dhe pas ekspozimit.
Ndërsa dihet mirë se cilësia e ajrit ndikon në mushkëritë dhe sistemin kardiovaskular, truri është më pak i studiuar.
Ian Mudway, një toksikolog mjedisor nga Imperial College London, është një nga shkencëtarët që drejton studimin. “Gjatë 10 viteve të fundit, ne kemi filluar të shohim lidhje statistikore midis ndotjes së ajrit dhe një sërë çështjesh të lidhura me trurin – duke filluar nga mënyra se si fëmijët mësojnë, mënyra në të cilën ndryshon aftësia e tyre njohëse, deri te shëndeti mendor dhe rreziqet në rritje të demenca”, tha Mudway.
“Ajo që ne po përpiqemi të bëjmë në këtë studim është të bëjmë eksperimente për të kuptuar pse ekziston një lidhje, për të gjetur se cilët janë mekanizmat themelorë biologjikë që lidhin ndotjen e ajrit me efektet negative në trurin e njeriut”.
