Një punonjëse e Bashkisë së Klosit është marrë peng për katër orë, ndërsa autori i dyshuar i ngjarjes është arrestuar nga Policia.
Në pranga përfundoi një 48-vjeçar, banues në Klos, nën akuzën e “Heqjes së lirisë në mënyrë të paligjshme”.
Nga specialistët për Hetimin e Krimit në Komisariatin e Policisë Mat u bë arrestimi në flagrancë i shtetasit D. M., 48 vjeç, banues në Klos, për veprën penale “Heqja e paligjshme e lirisë”.
Ai akuzohet se ka mbajtur për disa orë në makinën e tij, një 33-vjeçare, pa dëshirën e saj.
I riu akuzohet se ka mashtruar punonjësen e Bashkisë Klos, L. M, 33-vjeçe, banore e fshatit Bejn, duke i premtuar se do ta dërgonte në fshat. Mirëpo, pa kaluar disa metra, i dyshuari ka ndërruar rrugë dhe ka udhëtuar drejt fshatit Klos Katund.
Pas afro 4 orësh, punonjësja e Bashkisë ka mundur të njoftojë familjen se ishte rrëmbyer, duke treguar edhe vendndodhjen.
Babai i vajzës ka mbërritur në Polici dhe ka kërkuar ndihmë për gjetjen e saj.
Teksa binte nata, efektivët e Policisë kanë mbërritur në Klos Katund dhe kanë gjetur 33-vjeçaren në makinën e D. M.
Pas denoncimit, është marrë në pyetje edhe punonjësja e ndihmës ekonomike në Bashkinë Klos.
“Rreth orës 16.00 isha pranë xhamisë së Klosit, në anë të rrugës. Erdhi D. M., ndaloi te këmbët e mija dhe më tha: Hajde me mua, të çoj unë në shtëpi.
Sapo bëri nja 100 metra ndërroi rrugë dhe u nis në drejtim të Bulqizës. I thashë ta ndalte makinën dhe të zbrisja, por ai nuk pranoi. Pas afro 4 orësh arrita t’i dërgoj një mesazh babait”, i tha policisë e reja e rrëmbyer.
Vajza e mbajtur peng është dërguar në Tiranë për ekzaminime gjinekologjike.
