Goditen nga Komisariati i Policisë Nr. 2, në kuadër të operacionit policor të koduar “Fati i lojërave”, raste të tjera të organizimit të kundërligjshëm të lojërave të fatit. U kapën në flagrancë, duke vënë baste sportive, me celularë, vihen në pranga 3 shtetas dhe u sekuestrohen 3 aparatet celulare.
Në hetim për këtë veprimtari të kundërligjshme, pronari i lokalit ku u gjetën të arrestuarit.
Shërbimet e Komisariatit të Policisë Nr. 2, në vijim të punës për goditjen e paligjshmërive në fushën e lojërave të fatit, në kuadër të operacionit policor të koduar “Fati i lojërave”, kanë organizuar kontrolle në lokale dhe në ambiente të ndryshme, ku mund të organizohen lotari të palejuara. Si rezultat i kontrolleve të ushtruara janë evidentuar dhe goditur raste të tjera të kësaj veprimtarie.
Në vijim të veprimeve u arrestuan në flagrancë shtetasit:
– I. T., 26 vjeç, R. C., 19 vjeç dhe E. S., 41 vjeç, si dhe u procedua në gjendje të lirë pronari i lokalit ku u gjetën 3 shtetasit e arrestuar, shtetasi B. M., 50 vjeç, të katërt banues në Tiranë.
Gjatë kontrollit të ushtruar nga shërbimet e Policisë, në një lokal në rrugën “Ndre Mjeda”, dyshohet të vendosur në dispozicion nga shtetasi B. M., për organizimin e kundërligjshëm të lojërave të fatit, u kapën në flagrancë shtetasit I. T., R. C., dhe E. S., duke vendosur baste sportive, nëpërmjet celularëve të tyre, që iu sekuestruan në cilësinë e provës materiale.
Materialet procedurale i kaluan Prokurorisë, për veprime të mëtejshme.
