Janë 310 mijë e 846 zgjedhës në të terja bashkitë, ku do të zbatohet teknologjia që vullnetin e tyre politik do ta shprehin përmes kësaj pajisje.
I gjithë procesi i votimit kryhet vetëm me një të prekur të ekranit. Në fshehtësi të plotë, zgjedhësit do t’i shfaqen njëra pas tjetrës dy fletët e votimit, e para ajo për kandidatët për kryebashkiakë dhe më pas e dyta për këshillat bashkiakë. Jo vetëm koha e votimit është e shkurtër, në më pak se 3 minuta, por edhe rezultati i zgjedhjeve që do të dalë nga këto pajisje, do të jetë i shpejtë. Pas mbylljes së qendrave të votimit, në më pak se një orë, qytetarët dhe partitë politike do të njihen me tre fituesit e parë të vendoreve të majit.
Ne synojmë që brenda 30 minutave pas mbylljes së procesit të votimit të kemi rezultatin paraprak për bashkinë e Vorës, Kamzës dhe Elbasanit.
Për më të moshuarit, që ndoshta me teknologjinë nuk janë aq familjar, Komisioni Qendror i Zgjedhjeve do të ndjekë të njëjtën praktikë të dy proceseve të kaluara zgjedhore. Njëri prej administratës së saj do t’ua lehtësojë procesin e votimit, duke i orientuar në distancë për hapat që duhet të ndjekin.
Për ta mbështetur me suport teknik për përdorimin e pajisjes. Është i vendosur në një mënyrë të tillë që nuk merr asnjë lloj informacioni pamor mbi zgjedhjen që do të bëjë votuesi.
Në simulimin e votimit dhe numërimit elektronik, i vetmi nga partitë politike që ishte aty për të ndjekur atë ishte përfaqësuesi i koalicionit “Bashkë Fitojmë”. Daljen para mediave, Ilirjan Celibashi e shfrytëzoi edhe një herë për t’u thënë partive të caktuara politike, që të mos përhapin lajme të pavërteta se teknologjia nuk garanton fshehtësi.
Garancia është e plotë 100%. Kushdo që thotë të kundërtën është thjesht dhe vetëm një spekulant politik dhe që kërkon të përfitojë politikisht në raport me këtë çështje.
