Spanja ua ka refuzuar vizat sportistëve të Kosovës për Lojërat Botërore të Sportit që fillojnë nesër në Tortosa.
Sipas “Ebredigital.cat”, sportistët e Kosovës kanë kërkuar leje për të marrë pjesë në këtë ngjarje, por që ata kanë marrë përgjigje negative.
Kosova ka shpallur pavarësinë e saj më 17 shkurt të vitit 2008, derisa ka pasur mbështetjen e Shteteve të Bashkuara të Amerikës, Gjermanisë, Mbretërisë së Bashkuar, Kanadasë dhe Francës, përcjell Zëri. Pra, në këtë ngjarje nuk pritet të ketë vend për kosovarët, pasi që qëllimi i tyre ishte të garojnë nën flamurin e Kosovës.
Gjithsej 102 nga 193 shtete e kanë njohur Kosovën, por që shtete si Spanja, Argjentina, Rusia, Venezuela dhe Vietnami ngurrojnë ta bëjnë një gjë të tillë duke kërkuar respekt për Serbinë. Njëra ndër propozimet e ofruara nga Spanja ishte që kosovarët të merrnin pjesë nën delegacionin serb, por që kjo u refuzua kategorikisht nga Kosova.
Ndryshe, në Lojërat Mesdhetare në Tarragona të mbajtura vitin e kaluar, Spanja detyroi Kosovën të merrte pjesë, por vetëm me flamurin ndërkombëtar, jo me atë shtetëror. Kosova është pjesë e Komitetit Olimpik Ndërkombëtar nga viti 2014, derisa në Lojërat Olimpike “Rio 2016” ka mbajtur flamurin e saj për herë të parë në ndonjë garë.
