Peshëngritja shqiptare ka nisur një prej sezoneve më të rëndësishme, kualifikues për “Paris 2024”, teksa të premten ka mbajtur kampionatin kombëtar për të rritur.Aktiviteti i zhvilluar në ambientet e hotel “FAFA” pa të konkurronin sportistët më të mirë të shtangës.
Në radhët e femrave spikati edhe njëherë tjetër Enkileda Carja. Peshëngritësja e talentuar e Elbasanit mahniti edhe njëherë me paraqitjen e saj me rekord në kategorinë e peshave 59 kg.
Ndonëse në janar ka mbushur 15 vjeç, Enkileda konfirmohet si një talent i madh, duke u treguar superiore edhe në garën me të rriturat.
E stërvitur nga trajnerja Eglantina Kalemi, Carja po regjistron rezultate të shkëlqyera garë pas gare, ndërsa në kampionat u shpall sportistja më e mirë e aktivitetit në radhët e femrave.
Ndërkohë titulli kampion ekipor për femra shkoi për Tiranën.
Duke kaluar te meshkujt, Erkand Qerimaj ka ndezur motorët, teksa e ka nisur vitit me titullin e sportit më të mirë në kampionat, duke shkëlqyer në kategorinë e peshave 81 kg.
Sezonet kalojnë, por shkodrani mbetet gjithnjë në majë si një “ujk i vjetër” i shtangës, ndërsa rivalëve u duhet ende punë për ta mundur. Në rang ekipor për meshkuj është Tirana që vazhdon të bëjë ligjin, duke koleksionuar titullin e radhës.
Presidenti i FSHP-së, Elez Gjoza, përgëzoi sportistët për përkushtimin që po tregojnë: “Jam shumë i kënaqur me mënyrën e stërvitjes së sportistëve.
Ka ndryshuar tërësisht mënyra e sjelljes së sportistëve.
Tashmë nuk janë më ata sportistët tekanjozë, por janë nënshtruar një stërvitjeje serioze, pasi e gjithë federata është bërë tashmë kompakte.
Dua të falënderoj në radhë të parë trajnerët, të cilët janë duke bërë një sakrificë të jashtëzakonshme”, u shpreh ndër të tjera Elez Gjoza.
