Ish-mjeku i Ushtrisë Çlirimtare të Kosovës, Liri Loshi, ka reaguar ndaj LDK-së dhe Isa Mustafës, që sipas tij, po e zvarritin marrëveshjen për postin e presidentit.
Loshi përmes një postimi në Facebook, shkruan se Mustafa duhet të merakoset për rënien e LDK-së më shumë se sa për t’u bërë president i vendit.
Sipas tij, nëse shkohet në zgjedhje, Lëvizja Vetëvendosje do të dal e para, PDK-ja e dyta dhe LDK-ja do të dal e treta.
Për më shumë, lexojeni postimin e plotë nga Liri Loshi:
LDK-ja e ka hetuar se rajtingu i saj po bie, prandaj po tenton qe ta shfrytëzojë momentn për të grabitur sa më shumë pushtet, ngjashëm siç bëri AKR-ja dhe Behgjet Pacolli në zgjedhjet e kaluara. Por, ajo duhet të mësojë se një sjellje e tillë shton edhe më shumë antipatinë në popull dhe ndëshkimi me votë bëhet i paevitueshëm. LDK-ja nuk duhet të bëjë hapa me të cilët i bën gropën vetes, por të punojë për ta rritur votën dhe për të pasur rol kyq në zhvillimet politike në të ardhmen.
Po të isha në vendin e Isa Mustafës, do të merakosesha për renien rapide të shkëlqimit të LDK-së dhe jo për t’u bërë president i vendit. Ata që kanë grabitur dhe vazhdojnë të grabisin pushtet më shumë sesa e meritojnë, nuk do të kenë më të ardhme politike në Kosovë.
Sikur Vetëvendosje të vendoste për të shkuar qysh tash në zgjedhje të reja, është e sigurtë se LDK do të dilte partia e tretë, prapa PDK-së, meqë edhe atë pjesë të votave për ndryshim që e ka marrë Vjosa Osmani, do ta merrte Albin Kurti dhe Vetëvendosja!
Sepse, tashmë edhe njeriu më i thjeshtë e ka kuptuar se fenomeni Vjosa Osmani, nuk ishte një zhvillim i natyrshëm I LDK-së, por ishte një kurdisje e Isa Mustafës për ta rritur LDK-në në mënyrë të ngjashme me smadhimin e balonit përmes fryerjes. Por duhet ditur se shumica e gjerave që fryhen, ato ose shfryhen, ose pëlcasin. Këtë fat pra, mund ta ketë edhe baloni I LDK-së.