Gjykata Speciale, nga 15 korriku, i ka lejuar vizitat për familjarët e të paraburgosurve.
Nga Ministria e Drejtësisë kanë konfirmuar se deri më tani kanë pranuar dy kërkesa për vizita.
Genc Nimoni, shef i kabinetit të ministres Albulena Haxhiu, tha se kërkesë për vizitë kanë bërë familjarët e Jakup Krasniqit dhe Rexhep Selimit.
Nimoni tha se familjarëve të të paraburgosurve do t’iu lejohet qëndrimi deri në tre ditë në Hagë dhe ata do të mbështeten financiarisht nga shteti i Kosovës.
“Deri më tani i kemi pranuar dy kërkesa për vizita familjare në Hagë. Ato i kanë parashtruar familjarët e Jakup Krasniqit dhe Rexhep Selimit. Ata do të mbështeten edhe financiarisht nga shteti për qëndrim dhe ushqim. Ata kanë të drejtë që të qëndrojnë deri në tre ditë”.
