Kryeministri i Kosovës, Albin Kurti flet për bisedën që pati me këshilltarin e lartë të Departamentit amerikan të shtetit, Derek Chollet.
Kurti përmes një postimi në Twitter, tha se me Chollet diskutuan për rëndësinë e ecjes përpara në dialog përmes planit evropian.
Sipas tij, Kosova është e përkushtuar për marrëdhënie të mira fqinjësore.
“Mbrëmë bisedova me këshilltarin e lartë të Departamentit amerikan të shtetit, Derek Chollet, për rëndësinë e ecjes përpara në dialog të bazuar në propozimin e BE-së, i pranuar si bazë e mirë për bisedimet e mëtejshme. Si vendi më demokratik në rajon, Kosova është e përkushtuar për marrëdhënie të mira fqinjësore, në integrimin në BE dhe NATO”, ka shkruar Kurti.
Për bisedën telefonike, dje është deklaruar edhe këshilltari i departamentit të Shtetit, Derek Chollet, i cili tha se ShBA-ja e mirëpret vendimin e Kosovës për ta pranuar propozimin evropian, i njohur ndryshe si propozimi franko-gjerman, për normalizimin e marrëdhënieve me Serbinë.
Ai ka thënë se tani duhet zbatimi i plotë i propozimit evropian për t’i siguruar benefitet për të dy shtetet.
