Mbledhja e Qeverisë, ja vendimet e ndërmarra

Qeveria do të investojë për kompleksin memorial “Adem Jashari” në Prekaz dhe për këtë do të shpallet një konkurs ndërkombëtar.

Në mbledhjen e sotme të Ekzekutivit u miratua vendimi për aprovimin e kritereve, kushteve për shpalljen e konkursit si dhe procedurat e aplikimit të përzgjedhjes së projektit për kompleksin memorial “Adem Jashari”.

Ministri i Kulturës, Hajrulla Çeku, dha më shumë detaje në mbledhjen e Qeverisë.

Kjo ishte pika e parë e rendit të ditës së kësaj mbledhjeje.

Kryeministri Albin Kurti ka thënë në 25-vjetorin e rënies së familjes Jashari se kanë qëllim ta shndërrojnë këtë fshat në “peizash kulturor historik”.

Ministri i Shëndetësisë, Arben Vitia në mbledhjen e sotme të Qeverisë ka prezantuar Projektligjin për çmimin e produkteve medicinale.

Ky Projektligj mori mbështetjen e plotë të kabinetit qeveritar.

Gjatë prezantimit të tij ministri Vitia tha se kjo është një politikë e re në mbrojtjen e qytetarëve tanë.

“Kjo nismë rregullon çmimet e produkteve medicinale për qarkulluesit e licencuar farmaceutik me shumicë dhe pakicë, përfaqësuesit e mbajtësve të autorizimit për marketing dhe institucionet publike. Projektligji ka për qëllim që kostoja e barnave në tregun farmaceutik të jetë e përballueshme të jetë e krahasueshme me vendet e rajonit madje edhe më lirë, dhe vendet e tjera referente dhe çmimi i një bari do të jetë njësoj në çdo barnatore”, ka thënë Vitia.

Vitia shtoi se duke përcaktuar nivelizimin e çmimit të barnave dhe përcaktimin e çmimeve maksimale për blerje nga institucionet publike krijohet për herë të parë sistemi rregullativ në Kosovë.

“Miratimi i këtij Projektligji konsiderohet me ndikim të drejtpërdrejtë në shëndetësinë publike, duke ofruar qasje më të përballueshme të popullatës në barna të nevojshme. Ky sistem rregullativ është parakusht për themelimin e sistemit të rimbursimit të barnave”, tha Vitia. 

Në mbledhjen e sotme të Qeverisë së Kosovës është marrë vendim që të vazhdohet edhe për dy vite, konkretisht deri më datën 15 maj 2025, statusi për njohjen e personave që kanë përjetuar dhunë seksuale gjatë luftës.

Këtë pikë e prezantoi ministri i Financave Hekuran Murati.

“Gjithë personat që kanë përjetuar dhunë seksuale gjatë luftës kanë pasur mundësinë që të parashtrojnë kërkesë për njohjen e statusit të viktimës së dhunës seksuale gjatë luftës deri më datën 5 shkurt të këtij viti dhe me njohjen e statusit mundësohet edhe e drejta në mbështetje dhe benificione të tjera të përcaktuara në këtë ligj.

Duke konsideruar ndjeshmërinë në trajtimin e rasteve të dhunës, faktorët shoqërorë që mund të ndikojnë në raste të tilla që të lajmërohen në organet kompetente e poashtu marrë parasysh edhe faktin e vështirësisë së krijuar gjatë pandemisë ku është pamundësuar lëvizja e lirë, e kemi vlerësuar që është e domosdoshme që ky afat të shtyhet edhe për dy vite të tjera.Pra aplikimi për njohjen e statusit për personat që kanë përjetuar dhunë seksuale gjatë luftës të vazhdohet edhe për 2 vite tjera, deri më 15 maj 2015”, tha Murai.

Kjo pikë është miratuar nga Qeveria e Kosovës.

Në mbledhjen e sotme të Qeverisë së Republikës së Kosovës, mes të tjerash është votuar edhe për kërkesën për shpronësim të pronave të paluajtshme në rrugën Kijevë-Zahaq.

Të gjithë pjesëtarët e Qeverisë ishin “pro” kësaj kërkese, teksa zëvendësministri Hysen Durmishi bëri të ditur se qysh sot do të nisë procesi i prokurimit për këtë rrugë.

Ai tha se do të mbahen dëgjime publike me pronarët e pronave që preken nga procesi i shpronësimit.

Në nëntor të vitit të kaluar, Qeveria miratoi si pjesë të buxhetit për vitin 2023, edhe projektin infrastrukturor për rrugën Kijevë-Zahaq.

Buxheti i ndarë për këtë projekt është 4 milionë euro.

Qeveria e Kosovës, në mbledhjen e sotme, ka emëruar Gazmend Hoxhën drejtor të Policisë së Kosovës.

Procesi i konkursit sipas zëvendësministrit të Punëve të Brendshme, Bardhyl Dobra ka shkuar në rregull dhe sipas kritereve të parapara.

Ndërkaq, qeveria themeloi edhe komisionin për vlerësimin e sistemeve shtetërore të informacionit dhe komunikimit me rëndësi strategjike.

Kryeministri Albin Kurti sot ka hapur mbledhjen e Qeverisë me urim për Ditën e Grave, duke dhënë zotime se do të luftojë për barazi më të madhe gjinore.

“Ditë e shënuar, javë historike. Në Ditën Ndërkombëtare të Grave, të të gjitha grave, nderojmë sukseset që ato i kanë arritur historikisht, sot e çdo ditë nderojmë kontributin e grave që nuk janë më dhe luftojmë bashkë me gratë dhe vajzat për më shumë të drejta dhe barazi. Qeverisja jonë mbetet e përkushtuar ndaj politikave demokratike e sociale që e lehtësojnë barrën e padrejtësive që ato mbajnë mbi supe. Vazhdojmë përpjekjet dhe betejën për barazi shoqërore, për barazi gjinore. Prej shtëpisë deri në institucione”.

Kurti përmendi edhe veprën e grave në luftën çlirimtare të vendit, ndërsa përmendi edhe të mbijetuarit e dhunës seksuale gjatë luftës së fundit. Këtu ai lavdëroi guximin e Vasfije Krasniqit që doli publikisht për të rrëfyer historinë e saj dhe u bë zë avokues për të gjitha gratë e përdhunuara në luftë.

“Sot nderojmë veprën e grave ne luftën çlirimtare dhe përgjatë gjithë historisë tonë. Nuk harrojmë dhimbjen e madhe që nuk kalon dhe që shteti e ka obligim që ta shërojë. Po e vazhdojmë procesin e aplikimit për njohjen e statusit të të mbijetuarave dhe të mbijetuarve të luftës seksuale gjatë luftës. Një prej parakushteve për ndërtimin e paqes së qëndrueshme në vend. Nderojmë rolin e të mbijetuarave që kanë folur publikisht për rastet e tyre, e veçanërisht Vasfije Kransiqi-Goodman, që vazhdon të jetë avokuese e zëshme në vend dhe ndërkombëtarisht”.

Po ashtu, Kurti foli edhe për Ditën e Mësuesit që u shënua dje, si dhe Epopenë e UÇK-së.

Kryeministri Albin Kurti i ka ftuar ministrat në një mbledhje të Qeverisë.

Mbledhja është caktuar të mbahet të orën 10:00, siç njoftoi Zyra e Kryeministrit.

Pikat e rendit të ditës së kësaj mbledhjeje nuk u bënë të ditura.

Mbledhja e fundit e Qeverisë u mbajt më 24 shkurt, në formë elektronike.

Në atë mbledhje, Qeveria miratoi ndarjen e mjeteve financiare për vizitën e delegacionit të Luginës së Preshevës në Uashington D C.