Ambasadori i Gjermanisë në Kosovë, Jorn Rohde, ka dënuar incidentin e ndodhur të hënën mbrëma në veri, ku mbet i plagosur një qytetar serb.
Rohde megjithatë, e ka mirëpritur reagimin e Policisë së Kosovës për të hetuar rastin gjerësisht, ani pse përfshirja e zyrtarëve policorë fillimisht ishte mohuar nga ta.
”Jam plotësisht dakord. Një tjetër incident shqetësues sigurie. Është mirë të shohësh se Policia e Kosovës ka reaguar duke hetuar gjerësisht rastin. Sjellja e mundshme e keqe nga policia duhet të shqyrtohet si çdo tjetër. Viktimës i uroj shërim të shpejtë“, ka shkruar ambasadori gjerman, të mërkurën në rrjetin social Twitter.
Ai është pajtuar me reagimin e zyrës së Bashkimit Evropian në Kosovë e cila dënoi incidentin, duke thënë se ishin të përfshirë edhe zyrtarë të policisë.Policia e Kosovës të martën ka suspenduar katër zyrtarë të saj në lidhje me incidentin, ndërsa njëri nga ta dyshohet se ka gjuajtur me armë zjarri.
